हरेक भान्सामा प्रयोग हुने अनि लोकप्रिय तरकारी हो आलु । कृषिप्रधान देश भनिए पनि नेपालमा हरेक वर्ष आलुलगायत अन्य खाद्यान्नको आयातमा उच्च वृद्धि भइरहेको छ । पछिल्लो पाँच वर्षदेखि नेपालमा आलु आयातको ग्राफ बढ्दो रहेको भन्सार विभागको तथ्यांकले देखाउँछ । नेपालमा हरेक सिजनमा आन्तरिक कृषकहरूले उत्पादन गरेको आलु बजारमा देख्न सकिन्छ । तर, आन्तरिक उत्पादनले बजार धान्न नसक्ने भएपछि उच्च रूपमा आयात हुने गरेको विभागले जनाएको छ ।

नेपालमा हरेक वर्ष आलु आयातमा वृद्धि भइरहेको छ । आलु उत्पादन गर्ने क्षमता र सम्भावना नेपालमै भए पनि नेपालले हरेक महिना अर्बौको आलु आयात गरिरहेको छ । तरलताको अभाव, वैदेशिक मुद्रा सञ्चितिमा समस्या उत्पन्न भएको बेला आलुलगायत अन्य अर्बौं रुपैयाँका खाद्यान्नहरु नेपालले आयात गरिरहेको छ ।

नेपालले एक वर्षमा भारतबाट झण्डै साढे ७ अर्ब रुपैयाँ बराबरको आलु आयात गरेको छ । भन्सार विभागको तथ्यांकअनुसार गत आर्थिक वर्ष २०७७/७८ मा ७ अर्ब ३० करोड ७० लाख रुपैयाँको आलु आयात भएको छ । सो तथ्यांक हालसम्मकै उच्च हो । आयातित आलुबाट नेपालले ६८ करोड १३ लाख रुपैयाँ भन्सार महसुल संकलन गरेको थियो । चालु आर्थिक वर्षको पछिल्लो ८ महिनामा मात्रै नेपालमा ६ अर्ब ५४ करोड ५५ लाख रुपैयाँको २६ करोड २४ लाख ५१ हजार केजी आलु आयात भएको छ । उक्त आलुबाट नेपालले ६० करोड ६२ लाख रुपैयाँ भन्सार महसुल संकलन गरेको छ । 

नेपालले आव २०७६/७७ मा ६ अर्ब ३२ करोड ८५ लाख रुपैयाँको २५ करोड २२ लाख ३९ हजार केजी आयात गरेको थियो । आव २०७५/७६ मा ५ अर्ब ८१ करोड १७ लाखको २७ करोड ३९ लाख ८४ हजार केजी र आव २०७४/७५ मा ५ अर्ब ७४ करोड २४ लाख रुपैयाँको ३५ करोड ५४ लाख ४१ हजार केजी आलु आयात गरेको थियो । उक्त आलु नेपालले भारत र बंगलादेशबाट आयात गर्दै आएको हो ।

५ वर्षमा २ करोड बढीको आलुको बिउ आयात

नेपालले खानाका लागि मात्रै नभएर उत्पादनका लागि आवश्यक आलुको बिउ पनि उच्च रूपमा आयात गरेको विभागको तथ्यांकले देखाएको छ । नेपालले ५ वर्षको अवधिमा मात्रै २ करोड रुपैयाँ बढीको आलुको बिउ आयात गरेको छ । नेपालले आव २०७४/७५ देखि चालु आर्थिक वर्षको फागुन मसान्तसम्ममा २ करोड १८ लाख ८३ हजार केजी आलुको बिउ आयात गरेको छ । नेपालले आव २०७४/७५ मा १ करोडको आलुको बिउ आयात गरेको थियो भने आव २०७५/७६ मा ७४ लाख ५९ हजारको, आव २०७६/७७ मा २ लाख ८१ हजार, आव २०७७/७८ मा २७ लाखको र चालु आवको फागुन मसान्तसम्ममा १३ लाख ४० हजारको आलुको बिउ मात्रै आयात गरेको भन्सार विभागको तथ्यांकले देखाउँछ ।

वार्षिक साढे १ अर्बको आलुको चिप्स आयात आलु

आलुको बिउसँगै आलुको चिप्स ‘फ्रेन्चफ्राई’ पनि उच्च रूपमा आयात भइरहेको छ । वार्षिक रूपमा नेपालले आलुको चिप्स मात्रै करिब साढे १ अर्बको आयात गरेको तथ्यांकले देखाउँछ । गत वर्षमात्रै नेपालले १ अर्ब ४६ करोड १४ लाख रुपैयाँको ५ करोड ७६ लाख ८९ हजार केजी आलु चिप्स आयात गरेको थियो ।

त्यस्तै, चालु आवको ८ महिनाको अवधिमा मात्रै नेपालले २६ करोड ७२ लाखको आलु चिप्स आयात गरेको छ । आर्थिक वर्ष २०७६/७७ मा नेपालले १ अर्ब ९६ करोड ३९ लाखको ७ करोड ९७ लाख ५७ हजार केजी, आव २०७५/७६ मा १ अर्ब ५० करोड ५१ लाखको ७ करोड २८ लाख ८८ हजार केजी र आव २०७४/७५ मा ६० करोड ३२ लाख रुपैयाँको २ करोड ९० लाख ६२ हजार केजी आलुको चिप्स आयात गरेको तथ्यांमा उल्लेख गरिएको छ ।

प्रकाशित समय : १७:१८ बजे