साफ यू-१९ महिला च्याम्पियनसिपको उपाधि जित्ने लक्ष्यसहित बंगलादेश पुगेको नेपाली यू-१९ महिला फुटबल टिम फाइनल समेत पुग्न असफल भएको छ । पाँच राष्ट्र सहभागी च्याम्पियनसिपमा नेपाल राउण्ड रोबिन लिगको खेल सकिएपछि तेस्रो हुँदै बाहिरियो ।

आइतबार भएको आफ्नो खेलमा भारतसँग १-० ले पराजित भएपछि नेपाल फाइनल समेत पुग्न सकेन । योसँगै शिर्ष स्थानमा रहेको नेपाललाई उपाधी जित्नबाट भारतले रोकिदिएको छ भने भारतसँगको खेल नै अन्तिम बन्न पुगेकाे छ । पहिलो खेलमै बंगलादेशसँग गोलरहित बराबरी खेलेपछि नेपाललाई फाइनल पुग्न बाँकी तीन खेल जित्नैपर्ने दबाब थियो । श्रीलंका र भुटानविरुद्ध क्लिनसिट राख्दै सहज जित निकालेको नेपालका लागि भारतसँगको एक गोल अन्तरको हार नै महँगो बन्यो ।

बराबरी मात्र खेले पनि नेपाललाई फाइनल पुग्न पर्याप्त थियो । तर दोस्रो हाफमा प्रियंका देवीले गरेको गोल नै भारतलाई फाइनल पुर्‍याउन निर्णायक सावित बन्यो । यसअघिको खेलमा बंगलादेशसँग पराजित भएको भारतलाई फाइनल पुग्न नेपालविरुद्ध खेल जित्नैपर्ने थियो । नेपालले भने हार टारे पुग्ने थियो । तर भारत नेपाललाई हराउँदै फाइनल पुग्न सफल भयो ।