नेपालले ट्वान्टी–२० महिला विश्वकप एसिया छनोटमा बिहीबार कुवेतमाथि शानदार जित हात पारेको छ । छनोटका लागि अत्यावश्यक मानिएको खेलमै ठूलो अन्तरको जित हात पारेपछि नेपाली टोली आशातित देखिएको छ । किनकि यूएईमा भइरहेको प्रतियोगितामा नेपालले कुवेतलाई ९ विकेटले पराजित गरी छनोट हुने आशा कायमै राखेको छ ।

टस जितेर ब्याटिङमा आएको कुवेतलाई दुबईको आईसीसी एकेडेमी मैदानमा नेपालले १५.४ ओभरभित्र २७ रनमै अलआउट गर्‍यो । नेपालले ३.३ओभरमै आवश्यक विजय लक्ष्य पूरा गर्‍यो । कप्तान रुबिना क्षेत्रीले १० बलमा १२ र इन्दु बर्माले ८ बलमा १३ रन बनाई अविजित इनिङ्स खेलेपछि नेपालले सजिलो जित पाएको थियो । उपकप्तान सीता रानामगरलाई पहिलो ओभरको पाँचौं बलमा मारिया जस्भीले बोल्ड गरेकी थिइन् ।

पहिलो खेलमा हङकङसँग ६ विकेटले पराजित भएपछि नेपालका लागि बाँकी खेलहरूमा जित अन्तर फराकिलो आवश्यक थियो । नेपालले मंगलबार भुटानले छाडेको ६२ रनको लक्ष्यलाई ८.३ ओभरमा पूरा गरेको थियो । नेपालले अब शुक्रबार मलेसिया र आइतबार आयोजक यूएईसँग खेल्नेछ । घरेलु टोली यूएई पहिलो तीन खेल जितेर शीर्षस्थानमा छ । नेपाल र हङकङको ४-४ अंक छ । विजेताले मात्र ग्लोबल छनोटमा स्थान पाउने प्रावधान छ ।