Nepalese Flag २०७७ फागुन १७ गते सोमबार   |   March 01, 2021

सात महिनामा उपभोक्ता ठग्ने ६८४ व्यवसायीलाई कारबाही

बबिता तामाङ काठमाडौं फागुन १०, २०७७       

सात महिनामा उपभोक्ता ठग्ने ६८४ व्यवसायीलाई कारबाही

वाणिज्य आपूर्ति तथा उपभोक्ता संरक्षण विभागले सात महिनामा उपभोक्ता ठग्ने ६८४ व्यवसायीलाई कारबाही गरेको छ । विभागले चालू आर्थिक वर्ष २०७७/७८ को माघसम्ममा २ हजार १५१ व्यवसायको अनुगमन गर्दा कानुनविपरीत सञ्चालित ६८४ व्यवसायीलाई कारबाही गरेको हो ।

विभागले ६८४ व्यवसायीलाई १ करोड ७६ लाख ९७ हजार रुपैयाँबराबर जरिवाना तिराएको छ भने १ हजार १०१ व्यवसायीलाई सामान्य सुधार गरी व्यवसाय सञ्चालन गर्न निर्देशन दिएको छ । विभागले अनुगमन गरेका फर्महरुमध्ये ६४ व्यवसाय सामान्य अवस्थामा पाएको छ ।

त्यस्तै २५८ वटा व्यवसायलाई अनुगमनपछि आवश्यक कागजात वा स्पष्टीकरण पेस गर्न बोलाएको विभागले जनाएको छ । माघसम्म उपभोक्ता ठग्ने १९ जना व्यक्ति वा साधनलाई नियन्त्रणमा लिइएको छ । विभागले २९ व्यवसायमा भने अनुगमनपछि तत्काल सिलबन्दी गरेको छ । तीन जनालाई अभियोजनमा लगिएको छ । विभागले सात महिनामा ३ करोड ७० लाख २६ हजार ४२८ रुपैयाँबराबरको खाना अयोग्य वा म्याद सकिएको सामान नष्ट गर्न लगाएको छ ।

लकडाउनकै बीच बदमासी

व्यवसायीले लकडाउनकै बीच पनि उपभोक्ता ठगी गरेका छन् । साउनदेखि असोजसम्म उपभोक्ता ठग्ने १३७ व्यवसायीलाई ७८ लाख ५७ हजार रुपैयाँबराबर जरिवाना गराएको विभागले जनाएको छ ।

तीन महिनामा ८०१ व्यवसाय अनुगमन गर्दा १३७ व्यवसायी कारबाहीमा परेका छन् भने ६२ सामान्य अवस्थाको पाइएको छ । त्यस्तै ४८४ व्यवसायलाई सामान्य सुधार गरी व्यवसाय सञ्चालन गर्न निर्देशन दिएको छ । विभागले ९८ हजार ७२२ रुपैयाँबराबरको सामान तत्कालै नष्ट गरेको छ ।

यसबाहेक १०४ वटा व्यवसायलाई आवश्यक कागजात पेस गर्न बोलाएको, नौवटा व्यवसायबाट परीक्षणका लागि वस्तुको नमुना लिएको, २२ वटा व्यवसाय सिलबन्दी गरेको, ६ जना व्यक्ति वा साधन नियन्त्रणमा लिएको र एउटा व्यवसायलाई अभियोजनमा लगिएको छ ।

कात्तिकमा १७७ व्यवसायीमाथि कारबाही

विभागले कात्तिकमा उपभोक्ता ठग्ने १७७ व्यवसायीलाई ३९ लाख ६२ हजार जरिवाना तिराएको छ । कात्तिकमा ३६८ वटा व्यवसाय अनुगमन गर्दा एउटा पनि व्यवसाय सामान्य अवस्थामा नपाएको विभागले जनाएको छ । अनुगमनमा परेका व्यवसायीमध्ये १५८ व्यवसायलाई तत्काल सुधार गरी व्यवसाय सञ्चालन गर्न निर्देशन दिइएको छ ।

त्यस्तै विभागले ५९ लाख ५७ हजार ३३६ रुपैयाँबराबरको खाना अयोग्य वा म्याद सकिएको सामान तत्काल नष्ट गर्न लगाएको छ । यसबाहेक विभागले १२ व्यवसायीलाई आवश्यक कागजात पेस गर्न बोलाएको, ६ वटा व्यवसायीलाई सिलबन्दी गरेको र दुईवटा व्यवसायलाई अभियोजनमा ल्याएको छ ।

मंसिरमा केही कम

विभागले मंसिरमा उपभोक्ता ठग्ने १०४ व्यवसायीलाई १७ लाख ७८ हजार जरिवाना तिराएको छ । मंसिरमा ३३७ व्यवसायको अनुगमन गर्दा १०४ व्यवसायी कारबाहीमा परेका छन् भने एउटा व्यवसायलाई सामान्य अवस्थामा पाएको विभागले जानकारी दिएको छ ।

मंसिरमा गरिएको अनुगमनमा विभागले १९० व्यवसायीलाई तत्काल सुधार गरी व्यवसाय सञ्चालन गर्न निर्देशन दिएको छ भने ४० वटालाई आवश्यक कारबाहीको लागि बोलाएको छ । त्यस्तै ३ करोड ५ लाख १५ हजार १५४ रुपैयाँबराबरको सामान तत्कालै नष्ट गर्न लगाइएको छ ।

पुसमा ठगीको अवस्था उस्तै

पुसमा विभागले ३५१ व्यवसायको अनुगमन गर्दा १०९ कारबाहीमा परेका छन् । विभागले १०९ व्यवसायीलाई १३ लाख ७४ हजार रुपैयाँबराबरको जरिवाना तिराएको छ ।

पुसमा १६८ व्यससायीलाई तत्काल सुधार गरी व्यवसाय सञ्चालन गर्न, ६६ व्यवसायीलाई आवश्यक कागजात पेस गर्न, ६ व्यवसायीलाई परीक्षणको लागि वस्तुको नमुना लिएको, एक व्यवसाय सिलबन्दी गरेको र १ लाख ३३ हजार १५ रुपैयाँबराबरको सामान नष्ट गरिएको छ ।

माघमा बदमासी बढ्यो

माघमा उपभोक्ता ठग्ने १५७ व्यवसायीलाई विभागले २७ लाख २६ हजार रुपैयाँबराबर जरिवना तिराएको छ । माघमा २९४ व्यवसायमा गरिएको अनुगमनमा १५७ व्यवसायी विभागको कारबाहीमा परेका हुन् । विभागले माघमा एउटा पनि व्यवसाय सामान्य अवस्थामा नभेटेको जनाएको छ ।

माघमा १०१ व्यवसायलाई तत्काल सुधार गरी व्यवसाय सञ्चालन गर्न निर्देशन दिएको, ३६ व्यवसायलाई आवश्यक कागजात पेस गर्न बोलाएको र ३ लाख २२ हजार ४१ रुपैयाँबराबरको सामान तत्कालै नष्ट गरेको छ ।

सम्बन्धित खबरहरु