काठमाडौं । प्रभु बैंक लिमिटेडले निष्कासन गरेको हकप्रद भर्ने समयसीमा भोली आइतबार समाप्त हुँदैछ । माघ ७ गतेदेखि १० बराबर ४ अनुपातमा अर्थात ४० प्रतिशत हकप्रद निष्कासन गरेको बैंकको फागुन १३ गते कार्यालय समयभित्र आवेदन दिइसक्नु पर्नेछ ।
बैंकले १०० रुपैयाँ अंकित मूल्यमा २ करोड ३५ लाख २५ हजार ६०८ कित्ता शेयर बिक्री खुला गरेको हो । बैंकको हकप्रदमा पुस २० गतेसम्म कायम रहेका शेयरधनीले मात्र आवेदन दिन सक्नेछन् । हकप्रदमा बिक्री प्रबन्धक सनराइज क्यापिटल लिमिटेड कमल पोखरी, प्रभु बैंकको प्रधान कार्यालय साथै बैंकको सम्पूर्ण शाखा कार्यालयहरु र आस्बा सदस्य सबै बैंक तथा वित्तीय संस्थाबाट आवेदन दिन सकिनेछ ।
प्रभु बैंकले चालू आर्थिक वर्षको दोस्रो त्रैमासमा प्रतिशेयर आम्दानी १४ प्रतिशतले वृद्धि गरी २१ दशमलव ५९ रुपैयाँ पुर्याएको छ । बैंकले खुद मुनाफा ६३ करोड ४९ लाख रुपैयाँ कमाएको छ । तर अघिल्लो वर्षको सोहिअवधिको तुलनाभन्दा ४२ प्रतिशतले कमि हुन आएको छ ।
अघिल्लो वर्षको सोही अवधिमा ५ अर्ब ८८ करोड रुपैयाँ चुक्ता पूँजी भएको प्रभु बैंकले चुक्तापूँजी ११ दशमलव ०९ प्रतिशतले वृद्धि गरी हाल ६ अर्ब ५३ करोड ३४ लाख रुपैयाँ पुर्याएको छ । जसले ५० प्रतिशत हकप्रद शेयर पनि वितरण गरेर ८ अर्ब रुपैयाँ पुर्याउने भएको छ ।
बैंकले जगेडाकोषमा १२० दशमलव ०१ प्रतिशतले वृद्धि गरी ३ अर्ब १० करोड ७१ लाख रुपैयाँ राखेको छ । बैंकले निक्षेप तथा कर्जा लगानी पनि बढाएको छ । बैंकको खुद व्याज आम्दानी तथा संचालन मुनाफा घटेको हुदा खुद मुनाफा पनि घटेको हो । बैंकले ५१ करोड २४ लाख रुपैयाँ खराबकर्जा उठाएको छ ।
बैंकले निष्कृय कर्जा शुन्य दशमलव ७६ प्रतिशतले घटेर ४ दशमलव १२ प्रतिशत रहेको छ भने जोखिम युक्त सम्पत्ति ११ दशमलव २४ प्रतिशत रहेको छ । जसको तरलता अनुपात २२ दशमलव ५३ प्रतिशत, मुल्य आम्दानीको अनुपात ११ दशमलव ५८ गुणा र प्रतिशेयर नेटवर्थ १६३ दशमलव ९२ रुपैयाँ रहेको छ ।

प्रकाशित समय : १३:५१ बजे