राष्ट्रिय जनता पार्टी (राजपा) नेपालको राष्ट्रिय महाधिवेशन पुस १५, १६ र १७ गते गर्ने विषयमा छलफल सुरु भएको छ । पार्टी केन्द्रीय कार्यालय बबरमहलमा जारी राजनीतिक समितिको बैठकमा अध्यक्ष मण्डलका सदस्यहरु राजेन्द्र महतो, अनिलकुमार झा र महेन्द्रराय यादवले छुट्टाछुट्टै विधानको मस्यौदा प्रस्ताव गर्दै महाधिवेशनको मिति प्रस्ताव गरेका हुन् ।
बैठकले पार्टी महाधिवेशनसम्मका लागि पार्टीको छुट्टै विधान बनाउने तयारी गरेकोे महासचिव केशव झाले जानकारी दिए । यसअघि, पार्टी दर्ताका लागि बनेको विधान पूर्ण नरहेकाले महाधिवेशनसम्मका लागि अर्को विधान बनाउन लागिएको उनले बताए ।
राजपा नेपालको हालको विधानमा एक वर्षभित्रमा महाधिवेशन गर्ने उल्लेख छ । जसअनुसार असार ३० गतेभित्रै महाधिवेशन गर्न निर्वाचन आयोगले पनि पत्राचार गरेकाले महाधिवेशन गर्ने प्रयोजनका लागि ६ महिनाको थप म्याद मागी सोहीअनुसार महाधिवेशन सम्पन्न गर्न महतोले अर्काे विधानको प्रस्ताव गरेका हुन् ।
महतोद्वारा प्रस्तुत मस्यौदामा देशभरका सबै वडाको अधिवेशन कात्तिक ६ गते, गाउँपालिका, नगरपालिका, उपमहानगरपालिका र महानगरपालिकाको अधिवेशन कात्तिक १० गते र महाधिवेशन प्रतिनिधिको अधिवेशन कात्तिक १२ गते गरिसक्ने उल्लेख छ ।
महतोले प्रदेश १ का सबै जिल्ला अधिवेशन कात्तिक १४, प्रदेश २ का सबै जिल्लाको अधिवेशन कात्तिक १५, प्रदेश ३ का सबै जिल्लाको अधिवेशन कात्तिक १६, प्रदेश ५ का सबै जिल्लाको अधिवेशन कात्तिक १७, प्रदेश ७ का सबै जिल्लाको अधिवेशन कात्तिक १८ र प्रादेशिक अधिवेशन मंसिर १ र २ गते सम्पन्न गरिसक्नुपर्ने प्रस्ताव गरेको नेताहरुले बताएका छन् ।
बैठकमा महाधिवेशनको मितिका साथै, समसामयिक राजनीतिक अवस्था, संसदीय दलको नेता चयन, संसदीय दलको विधानलगायत एजेन्डामा छलफल जारी छ ।

प्रकाशित समय : २३:२० बजे