प्रदेश एकका मुख्यमन्त्री शेरधन राईले प्रदेश सरकारले विपद् ब्यवस्थापनको काम गरिरहेको बताएका छन । गृहमन्त्रालय र प्रदेश १ आन्तरिक मामिला तथा कानून मन्त्रालयद्धारा संयुक्त रुपमा विराटनगरमा आयोजित विपद् जोखिम न्यूनिकरण व्यवस्थापन कार्यक्रममा उनले विपद्बाट प्रदेशका जनतालाई सुुरक्षित व्यवस्थापनका लागि सरकारले आवश्यक सामाग्रीको लागि गोदाम लगायतका सम्पूर्ण कार्य तयारी अवस्थामा राखेको बताए ।

मुख्यमन्त्री राईले सरकारले प्रदेशमा आईपर्ने विभिन्न प्रकारको जोखिमको न्यूनिकरण गर्न संघीय लगायत स्थानीय सरकारको सहयोगमा कार्य गर्ने बताए ।

प्रदेश १ का आन्तरिक मामिला तथा कानून मन्त्री हिक्मत कार्कीले नदी किनारामा घर निर्माणमा स्थानीय निकायले रोक लगाउनुपर्ने धारणा व्यक्त गरे । उनले खोलानालाको प्राकृतिक स्रोतको उचित व्यवस्थापन नगरेका कारण जोखिम वढेको वताउदै विगतमा भन्दा अहिले जोखिममा वृद्धि भएको बताए ।

कार्यक्रममा विराटनगर महानगरपालिकाका मेयर भीम पराजुलीले प्राकृतिक प्रकोपवाट हुने जोखिम न्यूनिकरणका लागि वजेट विनयोजन गरी आवश्यक सामाग्रीको बन्दोवस्तका साथ विभिन्न ५० वटा संघसंस्थासंग सहकार्यका लागि छलफल सम्पन्न गरेको जानकारी दिए ।

प्रदेश १ मा प्राकृतिक प्रकोपमा परी ७ वर्षमा ७ सय २६ जनाको मृत्यु भएको छ । १७ जना बेपत्ता भएका छन् भने १ हजार ९९ जना घाइते भएको तथ्यांक कार्यक्रममा सार्वजनिक गरिएको थियो ।