कैलाली सदरमुकाम धनगढीबाट बझाङका विभिन्न स्थानका स्थानीयलाई वितरण गर्न भन्दै लगिएका छाडा गाईगोरु धमाधम मर्न थालेका छन् । बझाङका विपन्न समुदायलाई वितरण गर्न धनगढी उप–महानगरपालिकाले ठेकेदारमार्फत पठाएका छाडा गाई बाटोमै मर्न थालेका हुन् ।

सदमुकाम धनगढी नजिकै रहेको कैलालीको गोदावरी नगरपालिका र छिमेकी चुरे गाँउपालिका क्षेत्र पुर्याउँदै गाईहरु मर्न थालेका र ठेकेदारले मरेका गाई यतिकै छाडिदिँदा समाजमा दुर्गन्धसमेत फैलिन थालेको छ ।

ठेकेदारले मरेका गाई गाड्न पनि आनाकानी गरेको स्थानीयको गुनासो छ । धनगढी दिपायल फास्ट ट्रयाकअन्र्तगत गोदावरी र चुरे गाँउपालिकाको सिमानामा पुर्याउँदा झण्डै तीन दर्जन गाईहरु मरेका चुरे गाँउपालिकाका स्थानीय बताउँछन् ।

उपमहानगरले केहि महिनाअघिदेखि बझाङ जिल्लाको खप्तड छान्ना गाउँपालिका र सुर्मा गाउँपालिकाका विपन्न समुदायलाई पशु चौपाया वितरण गर्ने भन्दै धनगढीे ठेकेदारमार्फत गाई पठाउन सुरु गरेको थियो । तर, पठाउन शुरु गरेको केहि दिनमै धमाधम पशुचौपाया मर्न थाल्दा पनि उपमहानगरसहितका सम्बन्धित निकाय थाहै नपाएजस्तो गरी बसेका छन् ।

धनगढी उप–महानगरपालिकाका मेयर नृप ओड बझाङको खप्तड छान्ना गाउँपालिकाका अध्यक्ष बर्खबहादुर रोकाया र सुर्मा गाउँपालिकाका अध्यक्ष नरबहादुर बोहराबीच दुवै गाउँपालिकाका विपन्न समुदायलाई छाडा पशु वितरण गर्ने सम्झौता वमोजिम नै आफूहरुले ठेकेदारमार्फत पठाउन थालेको बताउँछन् ।

नगरपालिकाले बझाङ पुर्याएबापत ठेकेदारलाई प्रतिगाई एक हजार रुपैयाँका दरले दिने सम्झौतासहित पहिलो चरणमा ६ सय ३५ छाडा गाई पठाएको थियो । तर, ठेकेदारको लापर्बाहीका कारण अधिकाशं गाई बाटोमै मर्न थालेपछि यो ठूलो समस्या बन्दै गएको छ ।
धनगढीबाट ९ सय गाई खप्तड छान्ना र सुर्मा गाउँपालिका पुर्याउने जिम्मा मोहन सिंहले पाएका थिए । छाडा गाईलाई हिँडाएर लैजान ठेकदारले ८, ९ जना हेरालुसमेत बाटोभरी लगाउने गरेका छन् । तर, हेरालुसमेत गाई गोरु व्यावस्थापनमा त्यती सक्रिय नहुने गरेको पाईएको छ ।

मरेका गाईको व्यवस्थापन नभएपछि स्थानीयबासी महामारी फैलिने चिन्तामा छन् । बझाङ जिल्लाका विपन्न समुदायलाई गाई वितरण गरेर जिल्लाको पोषणको अवस्थामा सुधार आउने दाबी उप–महानगरपालिकाको थियो । उप–महानगरपलिकाले सबै गाई गोरु बझाङ पुर्याएपछि मात्रै ठेकेदारलाई पैसा दिने बताएको छ । तर, सबै पुगीसकेको हाते प्रतिवेदन तयार गरी ठेकेदारले रकम बुझ्ने गरेका छन् ।

कैलालीका अधिकाशं नगरपालीका र गाउँपालिकाले यसरी नै छाडा पशु चौपाया पहाड पठाउने गरेका छन् । तर, कैलाली जिल्ला कटाउन नपाउँदै अधिकाशं गाईगोरु मरिसकेका हुन्छन् । केहि महिना अघिमात्रै जानकी गाउँपालीकाले कालिकोट पठाउन लागेका करिब ५० भन्दा बढी पशुचौपाय मोहोन्याल गाउँपालिका कटाउन नपाउँदै धमाधम मर्न थालेपछी स्थानीयले चर्को विरोध गरेका थिए । अहिले सो ठाउँवाट पशु चौपाय ओसारपसार गर्न बन्द गरिएको छ ।

प्रकाशित समय : १४:०५ बजे