फुटवलर टोनी क्रुजले इञ्जुरी समयमा निर्णायक गोल गरेपछि डिफेन्डिङ च्याम्पियन जर्मनीले स्वीडेनलाई २–१ गोलअन्तरले पराजित गर्दै सन् १९६२ पछि लगातार उपाधि जित्ने सपना जीवितै राखेको छ ।

ब्राजिलले १९५८ र १९६२ मा लगातार विश्वकप जित्दै इतिहास रचेको थियो । तर, २०१४ को विश्वकप विजेता टोली जर्मनी ५६ वर्षअघिको इतिहास दोहोर्याउने लक्ष्यसहित यसपटकको विश्वकपमा सहभागी भएपनि सुरुवाती खेलमै मेक्सिकोसँग पराजित भएको थियो ।

यसजितसँगै जर्मनी दोस्रो चरणको नजिक पुगेको छ । तर, खतरा भने अझै टरेको छैन । समूह एफमा चारवटै टोलीको दोस्रो चरण पुग्ने सम्भावना कायमै छ । कुन टोली दोस्रो चरणमा पुग्ने ? कुराको निक्र्यौल बुधबार हुने मेक्सिको र स्वीडेनको साथै दक्षिण कोरिया र जर्मनीबीचको खेलले निर्धारण गर्नेछ ।

मेक्सिको लगातार २ खेलमा जित हात पार्दै ६ अंकका साथ शीर्षमा छ भने एक खेलमा जित र एक खेलमा हार बेहोरेका जर्मनी र स्वीडेन क्रमशः दोस्रो र तेस्रो स्थानमा छन् । जर्मनीले बराबरी खेल्दा स्वीडेनले सामान्य जितबाट पनि उसलाई उछिन्दै अन्तिम १६ मा पुग्नेछ ।

भिक्टोर क्लासनले डीबक्सको मध्यभागमा उपलब्ध गराएको पासमा ओल्ड तोइभिनले ३२औं मिनेटमा गोल गर्दै स्वीडेनलाई सुरुवाती अग्रता दिलाएका थिए । खेलको ४८औं मिनेटमा मारिया गोमेजको पासमा मार्को राइजले गोल गर्दै जर्मनीका लागि बराबरी गोल फर्काएका हुन् । उनलाई प्रशिक्षक जोयचिम लोले मिसुज ओजिलको स्थानमा खेलाएका थिए ।

दोहोरो पहेलो कार्ड व्यहोरेका कारण जोर्मी बाउटिङ मैदान बाहिरिएपछि आखिरी १० मिनेटमा जर्मनी १० खेलाडीमा सीमित भएका थिए । तर, इञ्जुरी समयमा पाएको फ्रिकिकमा क्रुजले पेनाल्टी एरियाको बायाँ कर्नरबाट गरेको प्रहार गोलमा परिणत भएपछि जर्मनी लगातार दोस्रो हारबाट जोगिएको हो ।

१९७४ पछि पहिलो हाफमा पछि पर्दै दोस्रो हाफमा जित निकालेको जर्मनीले पहिलो पटक यस्तो व्यहोरेको हो । उसबेला पहिलो हाफमा १–०को अन्तरले पछि परेको जर्मनी दोस्रो हाफमा ४–२ले विजयी भएको थियो ।

टोनी क्रुजले ९४ मिनेट ४२ सेकेन्डमा गरेको गोल एक्स्ट्रा समयबाहेक जर्मनीले विश्वकपमा गरेको सबैभन्दा पछिल्लो समयको गोल हो । क्रुज पछिल्ला पाँच विश्वकप खेलका पाँच गोलमा संलग्न छन् । ३ गोल गरेका छन भने २ मा सहायकको भुमिका निर्वाह गरेका छन् ।

प्रकाशित समय : १३:३९ बजे