टीकापुर हत्याकाण्ड घटनाका वादी प्रतिवादी साक्षीसहित जिल्ला अदालत कैलालीमा पहिलो पटक उपस्थिति भएका छन । घटना भएको तिन वर्षपछि साउन ३० गते भएको पहिलो पेशीमा अदालतले वादी प्रतिवादीलाई साक्षी लिएर आउन दिएको आदेश अनुरुप आइतबार वादी प्रतिवादी साक्षी लिएर अदालत पुगी हाजिर गरेका हुन् ।

अदालतका अनुसार आइतबार वादीतर्फका ३५ र प्रतिवादीका तर्फबाट ५० जनाले अदालतमा उपस्थित भएर हाजिरी गरेका छन् ।

अदालतका शाखा अधिकृत नारायण ओझाले वादी प्रतिवादीका गरि ८५ जनाले आइतबार अदालतमा हाजिर गरेको जानकारी दिए । अदालतलमा आइतबार हाजिर नभएकाले कारण सहित आएमा यसपछि पनि हाजिरी गर्न पाउने अदालतले जनाएको छ ।

त्यस्तै, साक्षीको बयान लिन आवश्यक ठानेमा हाजिर नभएकालाई पनि अदालतमा बोलाइने बताईको छ । आइतबार हाजिर भएका साक्षीहरुको आइतबारदेखि नै बयान लिने कार्य सुरु गरिएको छ । आइतबार ३ जना वादी अर्थात् मुद्धा दिने पक्षकाको बयान लिइएको छ । दिपक न्यौपाने, राधा बोहरा र जग बहादुर साउदको बयान लिइएको हो । बयान लिने कार्य असोज १२ गतेसम्म चल्ने समेत उनले जानकारी दिए । यसपछि दैनिक ५ जनाको दरले बयान लिने कार्य गरिने र सोही अनुसार तारिक तोकेर प्रत्येक दिन बयानका लागि पाँच जनालाई बोलाईने अदालतका श्रेष्तेदार इन्द्रबहादुर कठायतले जानकारी दिए ।

उनका अनुसार वादी र प्रतिवादीका साक्षीहरुको बयान लिन कम्तीमा १५ दिन लाग्नेछ । त्यसपछि नियमित पेशी हुने भएकाले चाडै मुद्धाको फैसला हुने श्रेष्तेदार कठायतले बताए ।

थरुहट/थारुवान आन्दोलनको क्रममा २०७२ भदौ ७ गते आन्दोलनकारी र प्रहरीबीच दोहोरो झडपमा परी १ नाबालक र ७ प्रहरीको ज्यान गएको थियो । हालसम्म १ नाबालक, सांसद रेशम चौधरीसहित २६ जनालाई विभिन्न मुद्दा चलाई पुर्पक्षको लागि कारागार चलान गरेको छ ।

२ नाबालकलाई पोखरास्थित बाल सुधार गृह, सांसद रेशम चौधरीलाई काठमाडौंको डिल्लीबजारस्थित सदरखोर कारागारमा र बाँकीलाई कैलाली कारागारमा राखिएको छ । उनीहरूविरुद्ध कर्तव्य ज्यान, ज्यान मार्ने उद्योग र डाँका चोरी मुद्दा चलाएको जिल्ला अदालत कैलालीले जनाएको छ । घटनामा सग्लन अझै ३२ जना फरार रहेको प्रहरीले जनाएको छ ।