संयुक्त राष्ट्रसंघको महासभाको ७३ औँ अधिवेशनमा भाग लिन गएको नेपाली टोलीले धेरै कूटनीतिक गल्ती गरेको छ । झण्डादेखि प्रधानमन्त्री केपी शर्मा ओलीको परिचयपत्रसमेत उल्टो गरी राख्दै परराष्ट्र मन्त्रालयका अधिकारीले अस्वाभाविक त्रुटी गरेका हुन् ।

दुर्इ साता लामो अमेरिका भ्रमणमा प्रधानमन्त्री ओलीसँग २१ जनाको जम्बो टोली गएको छ । त्यससँगै संयुक्त राष्ट्र संघका लागि नेपाली स्थायी नियोगका कार्यवाहक राजदूतदेखि सयौं जना कूटनीतिक निकायका अधिकारीले तयारी गरेको कार्यक्रममा कूटनीतिक कमजोरी देखिनुलार्इ अस्वाभाविक मानिएको छ ।

असोज ९ गतेमा प्रधानमन्त्री केपी शर्मा ओली र क्यानडाका प्रधानमन्त्री जस्टिन ट्रुडोबीच संयुक्त राष्ट्रसंघको मुख्यालयमा भेटवार्ता भएको थियो । भेटको तालिका पहिल्यै सार्वजनिक भएको थियो भने भेटको तयारी पनि मिलाइएको थियो । तर, जब भेटवार्ताको क्रममा प्रधानमन्त्री ओली र क्यानडाका समकक्षी जस्टिन सिटमा बसे तब ठूलो कूटनीतिक त्रुटी देखियो ।

नेपालको परराष्ट्र अधिकारी तथा त्यहाँका कूटनीतिक नियोगका नेपाली प्रतिनिधिको कमजोरीका कारण प्रधानमन्त्री ओली क्यानडाका प्रधानमन्त्री बस्नुपर्ने कुर्सीमा बसे । आफ्नो कुर्सीमा ओली बसेपछि जस्टिन पनि नेपालको कुर्सीमा बस्न बाध्य भए । दुईपक्षीय हस्ताक्षर गर्नेसम्मको कार्यक्रममा प्रधानमन्त्री बसेको तर्फ क्यनाडाको झण्डा थियो भने क्यानडाका प्रधानमन्त्री बसेको पट्टि नेपालको झण्डा थियो । कूटनीतिक अभ्यासमा आ-आफ्नो देशको झण्डापट्टि सोही देशका प्रतिनिधि बस्ने प्रचलन छ ।

त्यस्तै, संयुक्त राष्ट्रसंघको महासभाको ७३ औँ अधिवेशनमा सहभागी हुँदा पनि प्रधानमन्त्री ओलीको परिचयपत्र उल्टो झुण्डाइएको थियो । थुप्रै कूटनीतिक अधिकारी तथा शिष्टाचार महापाल उपस्थित रहेको कार्यक्रममा प्रधानमन्त्रीको नाम र तस्बिर रहेको भाग छोपिएको र पछाडिको खाली भाग देखिएको थियो । संयुक्त राष्ट्र संघको कार्यक्रम भएकाले विश्वभर पुग्ने सो तस्बिरले नेपालको फितलो कूटनीति भन्दै सामािजक सञ्जालमा समेत आलोचना भयो ।

यी गल्ती भएपछि नेपाली टोलीले गल्ती सुधार्ने प्रयास गरेका छन् । प्रधानमन्त्री ओलीले बेलायती प्रधानमन्त्री थेरेसा मेसँग र नेपाल र माडागास्करबीच कूटनीतिक सम्बन्ध स्थापना गर्न गरिएको कार्यक्रममा भने झण्डालाई सही रुपमा प्रयोग गरिएको छ । बिहीबार संयुक्त राष्ट्र संघको मुख्यालयमा भएको भेटमा नेपालको झण्डातर्फ प्रधानमन्त्री ओली र बेलायतको झण्डातर्फ बेलायती प्रधानमन्त्री टेरिजा मेलाई देख्न सकिन्छ ।

यस्तै, परराष्ट्रमन्त्री प्रदीपकुमार ज्ञवाली तथा माडागास्करका विदेशमन्त्री एलोइ अलफोन्स म्याक्सिम दोभोले यससम्बन्धी समझदारीपत्रमा हस्ताक्षर गर्ने क्रममा जुन देशको झण्डा छ त्यतैपट्टि सोही देशका प्रतिनिधि छन् ।

संयुक्त राष्ट्र संघका लागि नेपाली स्थायी नियोगका कार्यवाहक राजदूत निर्मलराज काफ्ले र उनी भन्दा तल्ला तहका धेरै कर्मचारीले पहिल्यैदेखि तयारी थालिसकेका थिए । यससँगै परराष्ट्रमन्त्री ज्ञवाली, प्रधामन्त्रीका प्रमुख सल्लाहकार विष्णु रिमाल, संयुक्त राज्य अमेरिकाका लागि नेपालका राजदूत डा. अर्जुनकुमार कार्की र परराष्ट्र मन्त्रालयका सचिव शंकरदास वैरागी तथा नेपाल सरकारका अन्य वरिष्ठ अधिकारीसमेत कूटनीतिक विषयका थुप्रै जानकार सहभागी भएको कार्यक्रममै झण्डादेखि प्रधानमन्त्रीले लगाएको परिचयपत्रसमेत उल्टो हुनुलाई स्वाभाविक मान्न नसकिने जानकारहरु बताउँछन् ।

प्रकाशित समय : १९:२१ बजे