मुलुकमा अहिले बलात्कार, हत्या, हिंसाका घटना बढेको भन्दै चौतर्फी विरोध भइरहेको छ । यही बीचमा ललितपुरमा एउटा यस्तै घटना भएको छ, जहाँ बुबाले आफ्नी ११ वर्षीया छोरीको बलात्कार गरी गर्भवती बनाउँछन् र अपराध लुकाउन गर्भपतन पनि गराउँछन् । यो घटना सुन्नेलाई अचम्म लाग्न सक्छ । तर, ललितपुरको गोदावरी नगरपालिका ११ मा घटेको यो वास्तविक घटना हो ।

चापागाउँमा ११ वर्षीया छोरी ममता (नाम परिवर्तन) लाई जर्बजस्ती करणी गरी गर्भवती बनाइ उनका बुबा भीमबहादुर (नाम परिवर्तन)ले गर्भपतनसमेत गराएको घटना बाहिर आएको छ । प्रहरी अनुसन्धानपछि यो घटनाबारे थाहा भएको हो ।

भीमबहादुरले ०७४ चैत १५ गते राति ९ बजेदेखि २०७५ साउन १० गतेसम्म पटक–पटक छोरी ममतालाई करणी गरेका थिए । कसैलाई भनिस् भने मारिदिने धम्की दिँदै उनले करणी गर्ने गरेको कुरा ममताले अदातलमा बताएकी छन् । जिल्ला सरकारी वकील कार्यालयका सूचना अधिकत रमेश भट्टराईका अनुसार जबरजस्ती करणी गरेको र केही दिनपछि पेट बढेको तथा महिनावारी नभएको कुरा बुबालाई सुनाएको ममताले बताएकी छन् ।

यो कुरा सुनेपछि गर्भवती भएको वा नभएकोबारे जाँच गर्न भीमबहादुरले ममतालाई अस्पताल लगेका थिए । त्यहाँ उनले छोरीले आफ्नै पेट बोकेको थाहा पाए । त्यसपछि उनले छोरीलाई तिम्रो पेटमा पानी भरिएको भन्दै अस्पताल लगेर जचाउँनुपर्ने बताए । ११ वर्षीया छोरीलाई धेरै कुरा के थाहा हुनु ? ममताले हुन्छ भनिन् । छोरीको गर्भपतन गराउन उनले मेलेसियामा रहेकी श्रीमतीलाई ५० हजार रुपैयाँ पैसा पठाइदिन भने । छोरीको रोगबारे स्पष्ट नबुझे पनि श्रीमतीले हत्तपत्त ५० हजार रुपैयाँ पठाइदिइन् ।

त्यसपछि भीमबहादुरले चाबहिलमा रहेको सम्राट पोलिक्लिनिक एन्ड मेडिकल सेन्टरमा लगे । त्यहाँ आफ्नो देब्रे पाखुरामा सुई दिएको थाहा पाए पनि त्यसपछि के भयो आफूलाई थाहा नभएको ममताले अदालतमा बयान दिएकी छन् । ‘भोलिपल्ट म होसमा आउँदा मेरो योनीमा प्याड लगाएको र रगत बगिरहेको थियो, अहिलेसम्म मेरो पेट दुखिरहन्छ,’ ममताले भनेकी छन् ।

३ वर्षअघि आमा मलेसिया गएपछि ममता र उनकी बहिनी बुबासँगै डेरामा बस्न थाले । आफ्नो संरक्षक बुबाले नै आफूमाथि यस्तो गर्लान् भन्ने उनले कल्पना पनि गरेकी थिइनन् ।
छोरीको अप्रेसन नै गर्नुपर्ने स्थिति आएको थाहा पाएपछि भीमबहादुरकी श्रीमतीको मन थामिएन र उनी श्रीमानलाई थाहै नदिई घर आइन् । तर, श्रीमती फर्केको थाहा पाउनेबित्तिकै भीमबहादुर छोरीसहित फरार भए ।

त्यसपछि भीमबहादुरकी श्रीमतीले श्रीमान र छोरी हराएको भन्दै प्रहरीमा जाहेरी दिइन् । त्यसको केही दिनमै भीमबहादुर र ममतालाई प्रहरीले पत्ता लगायो । आमालाई अगाडि देखेपछि ममतालाई आफूमाथि घटेका सबै वृतान्त रुँदै सुनाइन् । भीमबहादुरले पनि छोरीमाथि करणी गरेको स्वीकार गरे । उनले बयान दिँदा भनेका छन्, ‘मैले गल्ती गरेँ, मलाई जस्तो सजाय दिँदा पनि कमी हुन्छ, बरु फाँसी दिनुस् ।’

प्रकाशित समय : २१:५८ बजे