ठेकेदारको ढिलासुस्तीले समयमै सडक निर्माण नहुँदा धुलोधुवाले प्रदूषण बढेको भन्दै स्थानीय वासिन्दाले शुक्रबार कलंकी–नागढुंगा सडक अवरुद्ध पारेका छन् । समयमै सडक निर्माणको काम सक्न उनीहरुले चेतावनी पनि दिएका छन् ।

शुक्रबार बिहान साढे ८ बजेदेखि उनीहरूले २ घन्टा सडक अवरुद्ध पारे । वर्षौंदेखि लथालिंग रहेको कलंकी–नागढुंगा सडकको धुलोलेस्वच्छ हावामा सास फेर्न पाउनु पर्ने नागरिकको अधिकार हनन भएकाले आफूहरू आन्दोलनमा आउनु परेको उनीहरूको भनाइ छ ।

धुलोका कारण जेष्ठ नागरिक र बालबालिकामा फोक्सो, किड्नीको समस्या देखिन थालेको चन्द्रगिरी १५ का शिव श्रेष्ठले बताए ।

स्थानीयले अवरोध गरेपछि प्रमुख जिल्ला अधिकारी, ठेक्का पाएको कम्पनी शैलुङ कन्स्ट्रक्सन, प्रहरी र स्थानीयबीच वार्ता भएको छ । वार्ताबाट समाधान ननिकालिए फेरि आन्दोलन गर्ने स्थानीयबासीले चेतावनी दिएका छन् । त्रिपुरेश्वर–कलंकी–नागढुंगा ९.१ किलोमिटर सडकको ठेक्का नेकपाका अध्यक्ष पुष्पकमल दाहालका घरबेटी शारदाप्रसाद अधिकारीको सैलुङ कन्स्ट्रक्सनले पाएको छ । यो सडक एक अर्ब १३ करोड, ८४ लाख ३२ हजार ७३० रूपैयाँमा ठेक्का लागेको हो । एक वर्षे सम्झौता अनुसार २०७२ असार मसान्तमा अधिकारीले ठेक्का लिएका थिए । बढीमा पुस मसान्तसम्म सक्नु पर्ने भए पनि अहिलेसम्म ५० प्रतिशत काममै अल्झिएकाले स्थानीयबासी आन्दोलित बनेका हुन् ।

प्रकाशित समय : २०:५६ बजे