मुलुकको एक मात्र सरकारी राष्ट्रिय ट्रमा सेन्टरमा एम. आर.आई मेसिन नहुँदा बिरामी महंगो शुल्क तिर्दै निजी अस्पताल धाउन बाध्य भएका छन् ।

दुर्घटनामा परी अङ्ग भङ्ग भएका बिरामीको जाँचका लागि एम. आर.आई मेसिन अभावमा ट्रमा सेन्टरले अन्य निजी अस्पतालमा उपचार गर्न रेफर गरिरहेको छ । सस्तो र सुलभ उपचार हुने भन्दै पुगे पनि गम्भीर अवस्थाका बिरामीले समयमै उपचार नपाएर ज्यानसम्म गुमाउनुपर्ने खतरा छ ।

स्वास्थ्य तथा जनसंख्या मन्त्रालयले गत जेठमा एम. आर.आई मेसिन खरिदका लागि अर्थमन्त्रालयसँग बजेट माग गरेको थियो । २५ करोड रकम बिनियोजन भए पनि निकासा नहुँदा मेसिन खरिद प्रक्रिया भने अघि बढेको छैन ।

के गर्छ ट्रमा सेन्टरले ?
दुर्घटनामा परी गम्भीर घाइते भएका र अङ्ग भङ्ग भएका बिरामीका लागि भारत सरकारको सहयोगमा निर्माण गरिएको हो ट्रमा सेन्टर । सन् २०१४ मा भारतीय प्रधानमन्त्री नरेन्द्र मोदी पहिलोपटक आउँदा यो अस्पताल नेपाल सरकारलाई हस्तान्त्रण गरिएको थियो । ट्रमा सेन्टरमा हाडर्जोनी सम्बन्धी विशेष उपचार हुन्छ ।

निजी अस्पतालको खर्च धान्न नसकेर बिरामीले अकालमा ज्यान गुमाउन नपरोस् भन्ने मनशायले ट्रमा सेन्टर स्थापना गरिएको हो । आम नागरिकको स्वास्थ्य क्षेत्रमा पहुँच पु¥याउने भनिए पनि अत्यावश्यक सेवा सुविधा अभावमा बिरामीले समस्या खेप्दै आएका छन् । हुनत् यो अस्पताल भौतिक रुपमा सुविधासम्पन्न छ । आवश्यक जनशक्ति छ । तर, व्यवस्थापन भने फितलो ।

किन भएन एम. आर. आई ?
यो अस्पतालमा अन्य सबै प्रविधि भए पनि एम. आर. आई मेसिनको अभाव छ । ट्रमा सेन्टरले मेसिनको आवश्यकता औल्याउँदै स्वास्थ्य मन्त्रालयसँग मेसिन खरिदका लागि आग्रह गरेसँगै बजेट बिनियोजन पनि भयो । तर, अर्थ मन्त्रालयले निकासा नगरिदिँदा खरिद प्रक्रिया अन्यौलमा परेको छ । सूचना अधिकारी अर्जुन भेटवालका अनुसार वीर अस्पतालमा एम. आर. आई भएकाले बजेट बिनियोजनमा ढिलाई भएको हुनसक्छ ।

मासिक ४० भन्दाबढी बिरामी रेफर
एम. आर. आई विशेष गरी टाउकोमा लागेको चोट र स्पाइनल इन्जुरीका लागि हो । तर ट्रमाले यो सुविधा नभएको भन्दै मासिक ४० जना भन्दाबढी बिरामी अन्य अस्पतालमा रेफर गर्छ । सुचना अधिकारी भेटवाल भन्छन्, ‘मासिक ४० भन्दाबढी जटिल प्रकृतिका बिरामी आउछन् । तर, हामीसँग एम. आर. आई मेसिन नभएकोले अप्रेशनमा समस्या देखिने हुँदा अन्य हस्पिटलमा रेफर गर्न बाध्य छौ ।’

स्वास्थ्य जस्तो अत्यावश्यक सेवामा सर्वसाधारणको सहज पहुँच नहुँदा अकल्पनीय दुर्घटना हुने गरेका छन् । गम्भीर र जटील प्रकृतिका बिरामीको उपचार गर्न खोलिएको अस्पतालमै आवश्यक सेवा अभाव हुनुलाई के भन्ने ?