बेलका नगरपालिकाका थारु समुदायले जितिया पर्व मनाएका छन् । वडा नं. ९ सातपत्रेमा कार्यक्रमको आयोजना गरी थारु महिलाहरुले जितिया पर्व मनाएका हुन् । अघिल्लो वर्षजस्तै ‘जितिया सातपत्रे’ कार्यक्रम आयोजना गरियो । तर, यसपटक पर्वका अवसरमा स्थानीय थारु महिलाले छुट्टा छुट्टै कार्यक्रमको आयोजना गरेका थिए ।

स्थानीय शंकरवर्ती चौधरीको अध्यक्षतामा एउटा कार्यक्रम आयोजना गरिएको थियो भने त्यही नजिकै तपेश्वरी चौधरीको अध्यक्षतामा अर्को कार्यक्रम आयोजना गरिएको थियो । चाखलाग्दो विषय के थियो भने दुबै कार्यक्रममा प्रमुख अतिथिका रुपमा बेलका नगरपालिकाका नगरप्रमुख दुर्गाकुमार थापालाई बोलाइएको थियो । केही वडाध्यक्षहरुले पनि दुबै कार्यक्रममा निम्ता पाएका थिए ।

एउटै गाउँमा दुईवटा कार्यक्रम आयोजना गरिए पछि प्रमुख अतिथिका रुपमा निम्ता पाएका नगर प्रमुख थापा, अतिथिका रुपमा बोलाइएका वडाध्यक्षलगायत अलमलिए । यद्यपि, समय मिलाएर उनीहरुले दुबै कार्यक्रममा सहभागिता जनाए । ‘३० सेकेन्डको फरकमा दुई वटा कार्यक्रम आयोजना गरिए पछि हामी नै अलमलियौँ,’ अतिथिका रुपमा बोलाइएका एक वडाध्यक्षले भने, ‘अर्को वर्षदेखि उहाँहरुले एक ढिक्का भएर जितिया पर्व मनाउनुहुन्छ भन्ने विश्वास छ ।’

कार्यक्रमलाई सम्बोधन गर्दै नगर प्रमुख थापाले महिलाहरुलाई मिलेर अघि बढ्न सुझाव दिए । ‘तपाईंहरु मिलेर अघि बढ्नुभयो भने त्यसमा एउटा शक्ति झल्किन्छ,’ उनले भने, ‘अर्को वर्ष मिलेर कार्यक्रम गर्नुस् त्यसको प्रभाव तपाईंहरुले थाहा पाउनुहुनेछ ।’

वडा नम्बर ९ का वडाध्यक्ष मोहन घिमिरे, ४ का वडाध्यक्ष दीपक दंगाललगायतले उत्पादनशील कर्ममा मिलेर अघि बढ्न महिलाहरुलाई सुझाव दिए ।

तपेश्वरीको अध्यक्षतामा भएको कार्यक्रममा एक जेष्ठ नागरिकलाई खादा ओढाएर सम्मान गरिएको थियो । दुबै कार्यक्रममा महिलाहरुले नाचगान गरेर रमाइलो गरेका थिए ।