एसिया प्यासिफिकको छैटौं क्षेत्रीय बैठक तथा प्रथम महिला सम्मेलन हङकङमा
वि.सं.२०७५ मंसिर २२ शनिवार १३:२०
shares

गैरआवासीय नेपाली संघ एसिया प्यासिफिकको छैटौं क्षेत्रीय बैठक तथा प्रथम महिला सम्मेलन हङकङमा हुँदै छ । एसियाली मुलुकमा रहेका गैरआवासीय नेपालीहरुको सहभागितामा नेपालमा लगानी प्रवद्र्धन गर्ने उद्देश्यले डिसेम्बर ८ र ९ मा एसिया प्यासिफिक सम्मलेन गर्न लागिएको हो ।
सम्मेलन ‘सम्मृद्ध नेपालका लागि लगानी र रोजगार, दायित्वसहित गैरआवासीय नेपालीलाई अधिकार’ भन्ने विषयमा केन्द्रित रहनेछ । सम्मेलनमा ठूला–ठूला आयोजना एवं व्यवसायको लगानीमा भन्दा पनि साना तथा मझौला व्यवसायको लगानी र त्यसमा देखिएका नीतिगत अफ्ठ्यारा अनि सम्भावनामाथि छलफल हुने गैरआवासीय नेपाली संघ, अन्तर्राष्ट्रिय समन्वय परिषदका प्रवक्ता भूषण घिमिरेद्वारा जारी विज्ञप्तिमा उल्लेख छ ।
यस्तै, एसियाली मुलुकका श्रम बजारमा नेपाली श्रमको प्रयोगमा रहेका समस्या पहिचान गर्दै समाधानका लागि पनि छलफल हुने संघले जनाएको छ । क्षेत्रीय सम्मेलनसँगै प्रथम महिला सम्मेलन पनि हुने भएकाले एसियाली क्षेत्रमा बस्ने नेपाली महिलाका विषयमा पनि गहन छलफल गरिनेछ । विशेषतः महिलामाथिको हिंसा, यौन दुर्व्यवहारलगायतका विषयलाई प्रमुख एजेन्डा बनाई, त्यसका लागि एनआरएनको भूमिका कस्तो रहनुपर्ला भन्नेबारेमा छलफल गरी त्यसको निष्कर्षको आधारमा सरकारको ध्यानाकर्षण गराउने संघको तयारी छ ।
सम्मेलनमा नेपाल सरकारको तर्फबाट कृषि तथा पशुपन्छी विकास मन्त्री चक्रपाणी खनाल सहभागी हुँदै छन् । त्यस्तै, पूर्वअध्यक्षहरु उपेन्द्र महतो, जीवा लामिछाने, शेष घले, देवमान हिराचन, वर्तमान अध्यक्ष भवन भट्टलगायत आइसीसीका पदाधिकारी, एनआरएन युरोप, अमेरिका, मध्यपूर्व, ओसनिया क्षेत्रका गैरआवासीय नेपाली प्रतिनिधि, हङकङका सरकारी निकायका अधिकारी र यस क्षेत्रका राष्ट्रिय समन्वय परिषदका प्रतिनिधिको सहभागिता रहनेछ । सम्मेलनमा उद्योग वाणिज्य महासंघका उपाध्यक्ष चन्द्रप्रसाद ढकाल, उद्यमी एवं व्यवसायी राजेन्द्र खेतानलगायत तीन सय ३० जना विशिष्ट व्यक्तिको उपस्थिति रहनेछ ।

























