काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

अर्थमन्त्रीले बनाएको समितिले दियो छलफललाई तीव्रता

9.56K
shares

पुँजीबजारको समस्या समाधानका लागि अर्थ मन्त्रालयले गठन गरेको समितिले सरोकारवालासँगको छलफललाई तीव्रता दिएको छ । राष्ट्र बैंकका डेपुटी गभर्नर शिवराज श्रेष्ठ नेतृत्वको समितिले मंगलबार पनि बैंकर्स, अर्थविद र सेयर बजारका लगानीकर्तासँग छलफल गरेको छ ।

सात दिनभित्र प्रतिवेदन बुझाउने गरी गठित उक्त समितिले ब्याजदरको अस्वाभाविक वृद्धि, त्यसले असर गर्ने क्षेत्र र समाधानका लागि कसको भूमिका के हुन सक्छ ? जस्ता प्रश्नको उत्तर खोज्ने अर्थ मन्त्रालयका राजस्व सचिव शिशिर ढुंगानाले जानकारी दिए । ‘पुँजीबजारको समस्या समाधानमा छलफल केन्द्रित छ,’ उनले भने, ‘सरोकारवालासँगको छलफलपछि समितिले आवश्यक सुझाव दिनेछ ।’

समितिले ब्याजदरको वृद्धि स्वाभाविक हो कि होइन भनेर अध्ययन गरिरहेको उनले बताए । बढिरहेको ब्याजदर र घटिरहेको सेयर बजारको सूचकबीचको सम्बन्ध, के–कति कारणले यस्तो अवस्था आयो र अब आउन नदिनलाई तत्काल के–कस्ता व्यवस्था गर्न सकिन्छ भन्नेमा केन्द्रित रहेर समितिले अध्ययन गर्नेछ । समितिले आइतबारदेखि नै सरोकारवालासँग छलफल गरिरहेको छ ।

समितिले राष्ट्र बैंकमा मंगलबार दुई चरणमा छलफल गरेको छ । एक चरणमा पुँजीबजारका लगानीकर्तासँग छलफल गरेको समितिले अर्को चरणमा नियामक तथा सरोकारवाला निकायका प्रतिनिधिसँग छलफल गरेको हो ।

धितोपत्र बोर्ड, लगानीकर्ता, बैंकर्स संघ तथा मर्चेन्ट बैंकर्स संघ, स्टक ब्रोकर एसोसिएसनका प्रतिनिधिलगायत सहभागी बैठकले समयसीमाभित्रै अर्थमन्त्रीलाई बुझाउने प्रतिवेदन तयार पार्नेछ ।

मंगलबारको बैठकमा सेयर लगानीकर्ताको तर्फबाट राधा पोखरेलले बोलेकी छन् । उनले लगानीकर्ताको समस्यालाई गम्भीर रुपमा लिइदिन आग्रह गरिन् । राष्ट्र बैंक र अर्थ मन्त्रालयका अधिकारीले भने समस्या समाधानका लागि नै समिति गठन गरिएकाले धैर्य गर्न भनेका थिए ।

यसअघि आइतबारको बैठकमा समितिले बैंकहरुबीच चलिरहेको ब्याजदर प्रतिस्पर्धाका विषयमा छलफल गरेको थियो । बैठकमा बैंकर्स संघका अध्यक्ष ज्ञानेन्द्र ढुंगानाले ब्याजदर साढे १३ प्रतिशतबाट पनि बढ्न सक्ने बताएका थिए । यी सबै विषयमा विभिन्न चरणको छलफलपछि सुझाव प्रतिवेदन तयार गरिने र सरकारले समाधानका लागि कदम चाल्ने समितिका एक सदस्यले बताए ।

साउनदेखि खासै स्थिर हुन नसकेको नेपालको वित्तीय बजारमा विभिन्न समस्या थपिएपछि समाधानमा सरकार नै अग्रसर बनेको हो । बैंकहरुले निक्षेपको ब्याजदर बढाएपछि त्यसको असर सेयर बजारमा देखिएको छ । वित्तीय चक्रमा ब्याजदर बढ्दा बचतकर्ता फाइदामा गए पनि त्यसले उद्योगमात्र नभई समग्र मुद्रा तथा पुँजीबजारलाई नै प्रभावित तुल्याएको छ । बैंकहरुले निक्षेपमा ब्याज बढी दिएपछि लगानीकर्ताहरु बैंकको बचत गर्न लालायित भए जसको कारण सेयर बजार घट्यो । निक्षेपको ब्याज बढेपछि कर्जाको ब्याजदर झन् चर्किने डरले बैंकबाट ऋण लिएर सेयरमा लगानी गर्नेहरु पनि पछि हटेका छन् । सेयर लगानीकर्ताहरु त आन्दोलन नै गरिरहेका छन् ।

यसैबीच, नेपाल स्टक एक्सचेन्जको मूलगेटमा रिले अनसनमा बसिरहेको लगानीकर्ताको समूहले आफूहरुलाई बाइपास गरेर भइरहेको बैठकप्रति आपत्ति जनाएको छ । मंगलबार एक विज्ञप्ति निकालेर आन्दोलनरत समूहले अर्थमन्त्रीले गठन गरेको कार्यदलमा प्रतिनिधित्व गर्ने लगानीकर्ताका नेता विचौलिया भएको आरोपसमेत लगाएको छ ।