एनएमबी बैंकको लक्ष्य उत्पादनमूलक क्षेत्र, बिनाधितो १५ लाखसम्म ऋण
वि.सं.२०७५ पुस २ सोमवार २३:३९
shares

एनएमबी बैंकले उत्पादनमूलक क्षेत्रलाई ७ प्रतिशत ब्याजदरमा सहुलियतपूर्ण कर्जा उपलब्ध गराउने भएको छ । सरकारले जारी गरेको सहुलियतपूर्ण कर्जाका लागि ब्याज अनुदानसम्बन्धी एकीकृत कार्यविधि २०७५ अनुसार बैंकले विपन्न वर्गका जनतालाई लक्षित गरी ‘एनएमबी सहुलियतपूर्ण कर्जा’ कार्यक्रम ल्याएको हो । यसै कार्याविधिलाई टेकेर बैंकले लघु तथा विपन्न वर्ग कर्जा उपलब्ध गराउनेछ ।
बैंकले आठवटा व्यवसायलाई लक्षित गर्दै व्यावसायिक योजनाका आधारमा बिनाधितो अधिकतम १५ लाख रुपैयाँसम्म ऋण उपलब्ध गराउनेछ । आन्तरिक उत्पादन बढाउन बैंकले आठवटा व्यावसायिक क्षेत्रमा कर्जा प्रवाह गर्ने योजना बनाएको प्रमुख कार्यकारी अधिकृत सुनिल केसीले जानकारी दिए । बैंकले व्यावसायिक कृषि तथा पशुपन्छीका लागि एक जनालाई १० लाख रुपैयाँसम्मको ऋण दिनेछ ।
शिक्षित युवा स्वरोजगारका लागि ७ लाख रुपैयाँसम्म, वैदेशिक रोजगारीबाट फर्किएका युवा परियोजनामा १० लाख रुपैयाँसम्म, दलित समुदायको व्यवसाय विकासका लागि १० लाख रुपैयाँसम्म, उच्च र प्राविधिक तथा व्यावसायिक शिक्षा कर्जाको लागि ५ लाख रुपैयाँसम्म, भूकम्प पीडितहरुको निजी आवास निर्माणका लागि ३ लाख रुपैयाँसम्म र महिला उद्यमशीलताका लागि १५ लाख रुपैयाँसम्म उपलब्ध गराउनेछ ।
बैंकले सरकारी कार्यक्रमलाई आफ्नो ऋणको स्किम डिजाइन गरेको हो । बैंकले महिलाको लागि कृषिका लागि आवश्यक पर्नेजति खर्चलार्इ कर्जाको रुपमा उपलब्ध गराउने हिसाबले ‘अग्रणी महिला कृषि कर्जा’ सञ्चालनमा ल्याएको छ । यसका लागि भने धितो आवश्यक पर्छ ।
ऋणका लागि सामान्य व्यावसायिक योजनासहित सामूहिक जमानी आवश्यक पर्ने बैंकले जनाएको छ । बैंकका जुनसुकै शाखा कार्यालयमा गएर ऋणको प्रस्ताव गर्न सकिनेछ ।
यसैगरी बैंकले निक्षेपकर्ताहरुलाई थप सुविधा प्रदान गर्ने उद्देश्यले एनएमबी सहारा बचत खाताअन्तर्गत विभिन्न १८ वटा गम्भीर रोग र दुर्घटनाबाट मृत्यु तथा पूर्ण अशक्त भएमा अधिकतम १० लाख रुपैयाँसम्मको बिमा सुविधा उपलब्ध गराउने भएको छ ।

























