काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

टप बाेर्डिङ स्कुलभन्दा अब्बल एउटा सरकारी विद्यालय

24.91K
shares

गत वैशाखसम्म कक्षा १ देखि ९ सम्म अध्ययन अध्यापन हुन्थ्यो, कुल विद्यार्थीको संख्या थियो ६८ जना । विद्यालयको भौतिक अवस्था पनि टिठलाग्दो थियो । तर, अहिले कालिका मानव ज्ञान मावि सेक्टर–२ को मुहार नै फेरिएको छ । अहिले कक्षा १२ सम्म पढाइ हुन्छ, विद्यार्थी संख्या त कुरै छाडौं, यो विद्यालयमा पढ्न चाहाने हजारौं विद्यार्थी कोटा नपाएर अन्य विद्यालय जान बाध्य छन् । आखिर यो सब कसरी सम्भव भयो त !

केही समयअघि मानव ज्ञान माविको रुपमा रहेको विद्यालय वैशाख १ गतेदेखि कालिका मानव ज्ञान माविको रुपमा सञ्चालन हुँदै आएको छ । बुटवल उपमहानगरपालिका–१०, कालिकानगरमा रहेको कालिका माविले स्वामित्व लिएपछि विद्यालयको मुहार फेरिएको हो । विद्यालयको भौतिक पूर्वाधार थपिएका छन् भने नेपाली माध्यमलाई पूर्णरुपमा विस्थापित गरी अंग्रेजी माध्यमबाट अध्ययन–अध्यापन थालिएको छ ।

ghanshyam patthak kalika manavgayan
घनश्याम पाठक

विद्यालयलाई रङरोगन गरी चिटिक्क पारिएको छ भने मन्टेश्वरी (बालशिक्षा) कक्षा पनि व्यवस्थापन गरिएको छ । कालिका मानव ज्ञान माविका प्रधानाध्यापक घनश्याम पाठक व्यवस्थापकीय पाटो राम्रो भयो भने गरे के हुँदैन र भन्ने पुष्टि भएको बताउँछन् ।

एक वर्षअघि ६८ जनामात्रै विद्यार्थी रहेको विद्यालयमा अहिले ५ सय ७ जना विद्यार्थी अध्ययन गरिरहेका छन् । कालिका मानव ज्ञान मावि मर्ज भएपछि विद्यालयले आधुनिक तरिकाबाट मन्टेश्वरी (बालशिक्षा) कक्षा सञ्चालन गरेको छ । अहिले यो सरकारी विद्यालयको पढाइ कुनै पनि अंग्रेजी नाम चलेका विद्यालयको भन्दा कम छैन ।

विद्यालयले बाल शिक्षादेखि कक्षा ११ सम्म नै अंग्रेजी माध्यममा अध्यापन गराउँदै आएको छ । प्रधानाध्यापक पाठक भन्छन्, ‘बाल शिक्षा कक्षादेखि ६ कक्षासम्म हामीले एक रुपैयाँ पनि अभिभावकबाट शुल्क लिँदैनौं ।’ कक्षा ६ मा कम्प्युटर शिक्षा लागू गरिएका कारण अभिभावकबाट न्यूनतम ३ सय रुपैयाँ शुल्क लिने गरेको पाठकले जानकारी दिए ।

कक्षा ६ देखि ११ सम्म विद्यालयले ३ सय रुपैयाँदेखि ६ सय रुपैयाँसम्म मासिक शुल्क लिँदै आएको छ, जुन रकम विद्यालयले शिक्षक व्यवस्थापन, भौतिक संरचना निर्माणलगायत शीर्षकमा खर्च गर्दै आएको छ ।

dinesh thapa, codrintor sactor 2
दिनेश थापा

कालिका मानव ज्ञान मावि सेक्टर २ का संयोजक दिनेश थापाका अनुसार नेपाली माध्यामका विद्यार्थीलाई कालिका मानव ज्ञान सेक्टर १ कालिकानगरमा व्यवस्थापन गरिएको छ । सेक्टर २ मा पूर्णरुपमा अंग्रेजी माध्यममा अध्यापन गराइएको छ । कालिका मानव ज्ञान मावि सेक्टर १ र सेक्टर २ गरी विद्यालयमा हाल ५ हजार ५ सय २९ जना विद्यार्थी अध्ययनरत छन् ।

नेपालकै सर्वोत्कृष्ट शिक्षा आवार्डसमेत प्राप्त गरेको विद्यालयमा अहिले ब्रिटिस काउन्सिलको शिक्षा पद्धतिअनुसार अध्यापन हुन्छ । नयाँ संरचना र व्यवस्थापनका कारण विद्यालयमा विद्यार्थीको चाप थामिनसक्नु छ । वैशाखमा विद्यालयमा भर्ना हुन आएका करिब २ हजार विद्यार्थीलाई फिर्ता पठाएको विद्यालयले जनाएको छ । सीमित स्रोत साधन र जनशक्तिका कारण विद्यार्थीको चाप थेग्न नसकिएको प्रधानाध्यापक पाठकले बताए ।

कालिका मानव ज्ञान माविको सेक्टर २ को २० लाख रुपैयाँ र साविक मानव ज्ञान माविको २० लाख रुपैयाँ गरी करिब ४० लाख रुपैयाँ लगानीमा कालिका मानव ज्ञान मावि सेक्टर २ मा क्यान्टिन भवन निर्माण, मन्टेश्वरी कक्षा सञ्चालन र विद्यालयको पर्खाल बनाइएको छ ।

kalika manavgayan sactor 2 (6)

विद्यालयले कक्षा ६ देखि ८ सम्म गणित, विज्ञान, अंग्रेजी र नेपाली विषयको प्रवेश परीक्षासमेत लिने गरेको छ । विद्यालयमा गुल्मी, पाल्पा, रुकुम, रोल्पा, अर्घाखाँचीदेखि नवलपरासीसम्मका विद्यार्थी अध्ययन गर्दैै आएका छन् ।

कालिका मानव ज्ञानमा दुई सय ८० शिक्षक कार्यरत छन् । मानव ज्ञान र कालिका समायोजन भएर कालिका मानव ज्ञान माध्यमिक विद्यालय भएको हो । साविक कालिकालाई ‘सेक्टर वान’ र साविक मानव ज्ञानलाई ‘सेक्टर टु’ भनेर सञ्चालन गरिएको छ । एउटै कक्षामा आठ वटासम्म सेक्सन छन् । कक्षा ४ सम्म अंग्रेजी भाषामा मात्रै पढाइ हुन्छ । त्यसमाथिका कक्षामा दुवै भाषाबाट पढाइ हुन्छ । कक्षा ९ देखि १२ सम्म कम्प्युटर इन्जिनियरिङको पढाइ हुन्छ ।

kalika manavgayan sactor 2 (6)

kalika manavgayan sactor 2 (6)