विश्व मधुमेह दिवसको अवसर पारेर पाटन प्याथल्याबको निःशुल्क मधुमेह जाँच शिविर सञ्चालन गरेको छ । निःशुल्क सञ्चालन भएको शिविरमा चर्चित हास्या कलाकार किरण केसीले निःशुल्क रगतको परीक्षण र डाक्टर परीक्षण गराएका छन् ।

शिविरमा १८० बिरामीले निःशुल्क सेवा लिएको प्याथल्याबका अध्यक्ष रेशम भट्टराईले न्युज कारोबारलाई जानकारी दिए । अध्यक्ष भट्टराईले विश्व मधुमेह दिवसको अवसरमा सुगर चेक अप र डक्टर चेक अप निःशुल्क रुपमा गरिएको बताए ।

रगत परीक्षण गराएपछि कलाकार केसीले रोग आँफैमा नराम्रो भएको उल्लेख गर्दै मधुमेहबाट बच्न खानपानमा विशेष ध्यान दिनुपर्ने अनुभव सुनाए । खानपानमा ध्यान दिँदा लामो समय सम्म मधुमेहबाट बँच्न सकिने केसीको भनाई थियो । विशेष अवसरमा शिविरहरु राख्नु राम्रो कार्य भएको उल्लेख गर्दै केसीले निरन्तर जनचेतना तथा शिविर लगायतका काम सरकारी तहबाट गर्नुपर्ने प्रतिक्रिया दिए ।

अध्यक्ष भट्टराईले मधुमेहका बिरामीहरुलाई सुविधा पुगोस् भन्ने उद्देश्यले प्याथल्याबले शिविर सञ्चालन गरेको बताए । शिविरमा सुगर चेक अप र डक्टर चेक अप निःशुल्क रुपमा गर्ने व्यवस्था गरिएको थियो ।

विश्व मधुमेह दिवसको अवसर पारेर बुधबार विहान १० बजेदेखि दिउँसो ३ बजेसम्म ल्याबले शिविर सञ्चालन गरेको हो । शिविरमा विशेषज्ञ चिकित्सकले बिरामीको जाँच गरेका थिए । शिविरबाट करिब २०० भन्दा बढी विरामीले सेवा लिने अपेक्षा भए पनि १८० जनाले सेवा लिएको भट्टराईले बताए ।

विश्वभरका १० मध्ये एक महिला मधुमेहको सिकार हुने गरेका छन् । मधुमेहको न्युनिकरणका लागि महिला र मधुमेह हाम्रो स्वस्थ भविष्यको अधिकार भन्ने नाराका साथ विश्व मधुमेह दिवश बिभिन्न कार्यक्रमका साथ सम्पन्न भएको छ ।