काठमाडौँ । महिला यु–१९ ‘ए’ क्रिकेट प्रतियोगितामा भारतविरुद्ध नेपाल १२५ रनले पराजित भएको छ ।

आज सम्पन्न खेलमा भारतले दिएको २०६ रनको लक्ष्य पछ्याएको नेपालले निर्धारित २० ओभरमा नौ विकेट गुमाएर ८० रन मात्र बनाउन सक्यो ।

नेपालका लागि सावित्री धामीले १९ र तृषना विश्वकर्माले १८ रन बनाए । अन्य नेपाली ब्याटरले भने दोहोरो अङ्कमा रन बनाउन सकेनन् । भारतका मैत्री मनियारले तीन ओभरमा एक मेडन राख्दै सात रन दिएर सर्वाधिक चार विकेट लिइन् ।

त्यसअघि भारतको बेङ्गलुरुस्थित भारतीय क्रिकेट नियन्त्रण बोर्ड (बीसीसीआई) को क्रिकेट मैदानमा टस जितेर पहिले ब्याटिङ गरेको भारतले निर्धारित २० ओभरमा चार विकेट गुमाएर २०५ रन बनाएको थियो ।

भारतका लागि भाविका अहिरेले ४८, तानिष्का शर्माले ३६, आर्या पोङ्दे र निधि महतोले समान ३५ तथा इरा जाधवले २६ रन बनाइन् । नेपालका टीका साहले दुई तथा रचना चौधरी र आशिका महराले समान एक–एक विकेट लिए ।

भारत भ्रमणअन्तर्गत शृङ्खलाको पहिलो खेलमा पनि नेपाली टोली नौ विकेटले पराजित भएको थियो । नेपालले अब बुधबार तेस्रो खेल खेल्ने तालिका छ ।

आगामी वर्ष घरेलु मैदानमा आयोजना हुने यु–१९ विश्वकपको तयारीस्वरूप नेपाली टोली भारतमा अभ्यास गरिरहेको हो ।