जग्गाको कित्ताकाट खुल्यो, खेतियोग्यबाहेकको जमिन खण्डिकरण गर्न पाइने
वि.सं.२०७५ पुस २८ शनिवार १४:०२
shares

सरकारले जग्गाको कित्ताकाटमा फुकुवा गरेको छ । डेढ वर्षदेखि रोकिएको कित्ताकाट शुक्रबारबाट फुकुवा भएको हो ।
भूमि व्यवस्था सहकारी तथा गरिबी निवारणमन्त्री पद्माकुमारी अर्यालले पत्रकार सम्मेलन गरेर २०६३ साउनदेखि रोकिएको जग्गाको कित्ताकाट खुला गरिएको जानकारी दिएकी हुन् । स्थानीय तहले खेतियोग्य जमिन नभएको पुष्टि गरी सिफरिस गरेमा कित्ताकाट गर्न पाइनेछ । स्थानीय तहले कृषि, वन, नापी, जग्गा प्रशासन र सहरी विकाससम्बन्धी प्राविधिक रहेका प्राविधिक समिति गठन गरी जग्गाको वर्गीकरण गर्नेछ । साउन २६ गतेपछि जग्गा खण्डीकरणसम्बन्धी जारी गरिएका सम्पूर्ण निर्देशन खारेज गरिएको उनले घोषणा गरिन् ।
घर व्यवहार नै रोकिएको भन्ने जनगुनासो आएपछि निर्णयको पुनर्विचार गरिएको अर्यालको भनाइ छ । सर्वोच्च अदालत, संसद सचिवालय अख्तियार दुरुपयोग अनुसन्धान आयोग, राष्ट्रिय सतर्कता केन्द्रको निर्देशनमा नै कित्ताकाट खुला गरिएको मन्त्री अर्यालको दावी छ ।
सरकारले योजना बनाएअनुसार कित्ताकाट हुने मन्त्री अर्यालको भनाइ छ । कृषियोग्य जमिनको खण्डिकरण भने गर्न पाइने छैन । खेतियोग्य जमिन कित्ताकाट गरी घडेरीको प्रयोजनका लागि बिक्री भए सो जग्गा पास नहुने मन्त्री अर्यालले बताइन् । कित्ताकाट खुला गर्ने निर्णय अस्थायी भएको उनको भनाइ छ ।

























