‘अफिस टाईम’मा सामाजिक सञ्जाल प्रयोग गर्न प्रतिबन्ध
वि.सं.२०७५ माघ ८ मंगलवार १७:०३
shares

अर्थ मन्त्रालय र यस मातहतका कर्मचारीले ‘अफिस टाईम’ मा सामाजिक सञ्जाल प्रयोग गरे कारबाही हुने भएको छ । मन्त्रालयले यससम्बन्धी आचारसंहिता बनाइ लागू गरेको छ । आचारसंहिताअनुसार अर्थ र यसमातहतका कर्मचारीलाई कार्यालय समयमा फेसबुक, ट्वीटर, इस्टाग्रामलगायतका सबै प्रकारका सामाजिक सञ्जाल चलाउन प्रतिबन्ध लगाइएको छ । ‘कार्यालय समय अवधिभर कार्य जिम्मेवारीमा रहेका कर्मचारीले मोवाइल वा कम्युटरमार्फत् व्यक्तिगत प्रयोजनका लागि साामजिक सञ्जालको प्रयोग गर्नु हुँदैन,’ आचारंहितामा भनिएको छ ।
कर्मचारीले कार्यालयमा कुनै व्यक्तिगत समस्या झेल्नुपरेको भए पनि सामाजिक सञ्जालमा त्यसलाई पोख्न नपाउने आचारसंहितामा उल्लेख छ । त्यतिमात्रै होइन, सरकारलाई असर पुग्ने खालका कुनै पनि पोस्ट र अनलाईन मिडियाका समाचार सेयर गर्न पनि प्रतिबन्ध लगाइएको छ । ‘आफूभन्दा माथिल्लो तहबाट भएका निर्णयमा कुनै पनि अनलाइन मिडियामा प्रकाशित भएका समाचार र सामाजिक सञ्जालमा सेयर गरिएका समाचारका लिंकमा कमेन्ट लेख्न पाइने छैन,’ आचारसंहितामा उल्लेख छ ।
कर्मचारीहरुले आफूभन्दा माथिल्लो निकायको स्वीकृतिबिना सरोकारवालाहरुलाई कामको सिलसिलामा कार्यस्थल बाहिर भेट्न पाउने छैनन् ।

























