सिरियाद्वारा ४० करोड क्याप्टागन गोली नष्ट
वि.सं.२०८३ मंसिर ६ आइतवार २१:४५
shares

सिरियाली अधिकारीहरूले सुरक्षा निकायका विभिन्न कारबाहीका क्रममा जफत गरिएका ४० करोड क्याप्टागन गोलीसहित ठूलो परिमाणको लागुऔषध नष्ट गरेको घोषणा गरेका छन् ।
लागुऔषध नियन्त्रण विभागले आइतबार विभिन्न सुरक्षा कारबाहीमा बरामद गरिएका लागुऔषध तथा मनोप्रभावकारी पदार्थ चरणबद्ध रूपमा नष्ट गरिएको जनाएको छ । सरकारी समाचार संस्था सानामार्फत जारी विज्ञप्तिअनुसार नष्ट गरिएका सामग्रीमा ४० करोड क्याप्टागन गोली, १२ दशमलव २ टन चरेस, २ दशमलव ३ टन गाँजाका बोट, छ किलोग्राम हेरोइन र ५४ लाख लागुऔषधयुक्त गोली रहेका छन् ।
लागुऔषध तस्करी, लुकाउने र ओसारपसारमा प्रयोग हुने सामग्री तथा रासायनिक पदार्थबाट लागुऔषध उत्पादन गर्ने उपकरणसमेत नष्ट गरिएको विभागले जनाएको छ ।
सन् २०११ मा गृहयुद्ध सुरु भएपछि कृत्रिम उत्तेजक पदार्थ क्याप्टागन सिरियाको प्रमुख अवैध निर्यातमध्ये एक बनेको थियो । यसले क्षेत्रीय बजारमा ठूलो प्रभाव पारेको र अपदस्थ राष्ट्रपति बशर अल–असदको शासनका लागि अवैध आम्दानीको प्रमुख स्रोतका रूपमा काम गरेको थियो ।
सन् २०२४ डिसेम्बरमा सत्ता सम्हालेका नयाँ अधिकारीहरूले लागुऔषधको अवैध कारोबार नियन्त्रण गर्ने प्रयास गरिरहेका छन् । सानाका अनुसार लागुऔषध नियन्त्रण विभागका प्रमुख खालिद इदले गत जुनमा असद सत्ताच्युत भएपछि तस्करीका प्रयास रोक्न अधिकारीहरूले एक हजार ५५० वटा कारबाही गरेको बताउनुभएको थियो ।
उहाँका अनुसार उक्त अवधिमा ९० वटा अन्तर्राष्ट्रिय तस्करी सञ्जाल ध्वस्त पारिएका, क्याप्टागन उत्पादन गर्ने १७ कारखाना बन्द गरिएका तथा ६९ करोड ७० लाख क्याप्टागन गोली र १५ टन चरेस बरामद गरिएको थियो ।

























