बुटवलमा नालीको खुला क्षेत्रलाई व्यवस्थित गर्दै वाइपास मोटरेवल मार्ग बनाउन सुरु गरिएको छ । काठेपुलदेखि नेपालगञ्ज रोडमा जोड्ने गरि नालीमाथि मोटरेवल मार्ग बनाउन लागिएको हो । शुक्रबार एक समारोहकाबीच नगर प्रमुख शिवराज सुवेदीले नयाँ प्रविधिको उक्त मार्गको शिलन्यास गरे । स्थानीयको सक्रियतामा सो मार्ग बनाउन लागिएको भन्दै उनले प्रशंसा गरे ।

उपप्रमुख गुमादेवी आचार्यले फुटपाथको उचित प्रवन्ध मिलाउँदै पैदल यात्रुलाई सहज हुनेगरिसडक निर्माणका कामहरु अगाडि बढाउन प्राविधिकहरुलाई सुझाव दिइन् । बुटवलको हाटबजार नजिकको जनशक्ति टोलबाट सुरु हुने यो मार्ग न्यु रोडमा जोडिएर नेपालगञ्ज रोडसम्म पुग्ने छ । स्थानीय १६ घरको उपभोक्ता समिति गठन गरेर जनसहभागितामा योजना अगाडि बढाइएको हो ।

सो वडाका वडाअध्यक्ष तेजप्रसाद विश्वकर्माले व्यस्त हाटबजार लाइनको वाइपास सडकका रुपमा विकास गरिने बताउनुभयो । उनले वडा नम्बर ५ मा रात्रिकालिन बजार सञ्चालन गर्नेदेखि नमुना वडा बनाउनेसम्मको योजना रहेको बताए ।

उक्त सडकको लागत ४३ लाख ३८ हजार चार सय ३१ रुपैयाँ अनुमान गरिएको उपभोक्ता समितिका अध्यक्ष धनपति पौडेलले बताए । उनले १६ घरमध्ये तीन घरपरिवारको आर्थिक अवस्था कमजोर रहेकाले त्यस्ता उपभोक्ताहरुको लागत सहभागितामा सहुलियत प्रदान गर्नुपर्ने बताए ।

शिलन्यास कार्यक्रममा कार्यपालिका सदस्य रञ्जित शेरचन, इन्जिनियर मोहम्मद खान, नेकपा नेता मणि खनाल, वडाका जनप्रतिनिधिहरु, उपभोक्ता समितिका सचिव इन्द्र रिजाललगायत सहभागीता रहेको थियो ।

प्रकाशित समय : १९:५२ बजे