काठमाडौं । भारतीय मूलका अमेरिकी अर्बपति तथा रिपब्लिकन नेता विवेक रामास्वामी ओहायोको गभर्नर निर्वाचनमा पराजित भएका छन्। उनलाई डेमोक्र्याटिक पार्टीकी उम्मेदवार एमी एक्टनले पराजित गरेकी हुन्।

एक्टनको जितसँगै उनी ओहायोको गभर्नरमा निर्वाचित हुने पहिलो महिला बनेकी छन्। साथै, दुई दशकपछि ओहायोमा डेमोक्र्याटिक पार्टीले गभर्नर पद जितेको छ।

निर्वाचन अभियानका क्रममा रामास्वामीको टोलीले एक्टनको पारिवारिक पृष्ठभूमिलाई लक्षित गर्दै विवादास्पद विज्ञापन सार्वजनिक गरेको थियो। उक्त विज्ञापनमा एक्टनकी अलग्गिएकी आमालाई प्रस्तुत गरिएको थियो। दशकौँअघि एक्टनका सौतेनी बुबामाथि बाल्यकालमा एक्टनलाई बलात्कार गरेको आरोप लागेपछि उनकी आमाले सन्तानको अभिभावकत्व गुमाएकी थिइन्।

विज्ञापनको विषयलाई लिएर ओहायोका रिपब्लिकन गभर्नर माइक डेवाईनसहित दुवै दलका नेताहरूले आलोचना गरेका थिए। तर अमेरिकी राष्ट्रपति डोनाल्ड ट्रम्पले विज्ञापनको समर्थन गरेका थिए भने उपराष्ट्रपति जेडी भान्सले पनि रामास्वामीको बचाउ गरेका थिए।

रामास्वामीको चुनावी अभियानमा ठूलो रकम खर्च भएको थियो। अर्बपति एलन मस्कले समेत रामास्वामीसँग निकट सम्बन्ध रहेको राजनीतिक कार्य समिति (पीएसी) लाई कम्तीमा ५० लाख अमेरिकी डलर सहयोग गरेका थिए। यद्यपि, ठूलो आर्थिक लगानी र ट्रम्पको समर्थनका बाबजुद उनी चुनावी प्रतिस्पर्धामा सफल हुन सकेनन्।

जनस्वास्थ्य चिकित्सकसमेत रहेकी एक्टनले स्वास्थ्य सेवामा सहज पहुँच र किफायतीपनलाई मुख्य चुनावी मुद्दा बनाएकी थिइन्। कोभिड–१९ महामारीका बेला ओहायोको स्वास्थ्य निर्देशक रहेकी उनले आफ्नो कठिन बाल्यकालको अनुभवसमेत मतदातामाझ राखेकी थिइन्।

बाल्यकालमा केही समय घरबारविहीन बनेकी एक्टनले एक हिउँद पालमुनि बिताउनुपरेको अनुभव सुनाउँदै श्रमिक तथा मध्यमवर्गीय मतदाताको समर्थन जुटाएकी थिइन्।

मतदान हुनुभन्दा केही घण्टाअघि रामास्वामीले सम्पत्ति कर घटाउने, बिजुलीको बिल कम गर्ने, किफायती आवास उपलब्ध गराउने र सडक सुरक्षामा सुधार गर्ने प्रतिबद्धता दोहोर्‍याएका थिए। निर्वाचित भए आफ्ना प्रतिबद्धता पूरा गरे–नगरेको विषयमा आफूलाई जवाफदेही बनाउन उनले मतदातासँग आग्रह गरेका थिए।

ओहायोका वर्तमान गभर्नर माइक डेवाईन कार्यकालको सीमाका कारण पुनः उम्मेदवार बन्न पाएका थिएनन्। पाँच दशक लामो राजनीतिक यात्रापछि उनी सार्वजनिक पदबाट अवकाश लिँदैछन्। अर्कोतर्फ, यसअघि कुनै निर्वाचित पदमा काम नगरेकी एक्टनले अब राज्यको कार्यकारी नेतृत्व सम्हाल्नेछिन्।

एक समय अमेरिकी राजनीतिमा निर्णायक मानिने ओहायो पछिल्ला वर्षमा रिपब्लिकन पार्टीको बलियो आधार बनेको थियो। सन् २०२४ को राष्ट्रपतीय निर्वाचनमा डोनाल्ड ट्रम्पले ओहायोमा सहज जित निकालेका थिए। यस्तो अवस्थामा एक्टनको जितलाई डेमोक्र्याटिक पार्टीका लागि महत्वपूर्ण राजनीतिक उपलब्धिका रूपमा हेरिएको छ।

यसअघि सन् २०२४ को अमेरिकी राष्ट्रपतीय निर्वाचनमा रिपब्लिकन पार्टीबाट उम्मेदवारी दिएका रामास्वामीले आयोवा ककसमा चौथो स्थान हासिल गरेपछि चुनावी दौडबाट बाहिरिँदै ट्रम्पलाई समर्थन गरेका थिए। यसपटक गभर्नर निर्वाचनमा पराजित भएपछि उनको राजनीतिक यात्रामा अर्को धक्का लागेको छ।