धनगढी । एभरेस्ट बैंकले कैलालीको धनगढीमा आफ्नो १३४औँ शाखा सञ्चालनमा ल्याएको छ । बैंकले धनगढी उपमहानगरपालिका–८ क्याम्पस चोकमा आफ्नै भवनबाट शाखा सञ्चालनमा ल्याएको हो ।

बैंकले असोज ५ गते नयाँ भवनको उद्घाटनसँगै सुदूरपश्चिम प्रदेशको प्रादेशिक कार्यालयसमेत सोही भवनमा स्थानान्तरण गरेको जनाएको छ । अब बैंकको सुदूरपश्चिम प्रदेशसम्बन्धी सम्पूर्ण सेवा नयाँ भवनबाटै सञ्चालन हुने छ ।

धनगढी उद्योग वाणिज्य संघका अध्यक्ष पुष्कर ओझा र एभरेस्ट बैंकका सञ्चालक समिति अध्यक्ष डा। बालगोपाल वैद्यले संयुक्त रूपमा नयाँ भवन तथा शाखाको उद्घाटन गरेको हो ।

उद्घाटन कार्यक्रममा धनगढी उपमहानगरपालिका–८ का वडाध्यक्ष जुगराम चौधरी, बैंकका प्रमुख कार्यकारी अधिकृत सुदेश खालिङ, सुदूरपश्चिम प्रदेश प्रमुख यज्ञराज तिमिल्सिना, स्थानीय उद्योगी–व्यवसायी, बैंकका कर्मचारी तथा स्थानीय बासिन्दाको उपस्थिति थियो ।

नयाँ शाखा सञ्चालनमा आएसँगै सुदूरपश्चिम प्रदेशमा एभरेस्ट बैंकका शाखाको संख्या १५ पुगेको छ ।

क्याम्पस चोकमा आफ्नै भवनबाट शाखा सञ्चालनमा आएपछि त्यस क्षेत्रका ग्राहकलाई बैंकिङ सेवा लिन थप सहज हुने बैंकले जनाएको छ । बैंकका अनुसार शाखा विस्तारसँगै स्थानीय आर्थिक गतिविधि बढाउन तथा क्षेत्रको समग्र आर्थिक विकासमा समेत योगदान पुग्ने अपेक्षा गरिएको छ ।

एभरेस्ट बैंकले शाखा विस्तारमार्फत ग्राहकलाई सहज र प्रभावकारी बैंकिङ सेवा उपलब्ध गराउने उद्देश्यले विभिन्न क्षेत्रमा आफ्नो उपस्थिति विस्तार गर्दै आएको छ ।