पोखरा । पोखरास्थित अन्तरराष्ट्रिय पर्वतीय सङ्ग्रहालय अवलोकन गर्ने पर्यटकको सङ्ख्या बढ्दै गएको छ ।

पर्यटकीययाम सुरु भएपछि सङ्ग्रहालयमा विस्तारै पर्यटकको आकर्षण बढ्दै गएको सङ्ग्राहलयका कार्यकारी निर्देशक निर्मलाकुमारी न्यौपानेले जानकारी दिइन । चाडपर्वसँगै सङ्ग्रहालय अवलोकनमा स्वदेशी तथा विदेशी पर्यटकको सङ्ख्या बढेको उनले बताइन ।

आर्थिक वर्ष २०८३/८४ को कात्तिक २० सम्म २० हजार ९३८ जनाले सङ्ग्रहालय अवलोकन गरेका छन् । उनका अनुसार यो चार महिनाको अवधिमा सार्क राष्ट्रका दुई हजार ८६८ र सार्क राष्ट्र बाहेक अन्य देशका छ हजार २९ जना र ४१ जना प्रवासी नेपालीले सङ्ग्रहालय अवलोकन गरेका छन् ।

साउनमा चार हजार ९९९, भदौमा तीन हजार ३४७, असोजमा छ हजार ४०३ र कात्तिक २० गतेसम्म छ हजार १८९ जना स्वदेशी तथा विदेशी पर्यटक सङ्ग्रहालय पुगेको कार्यकारी निर्देशक न्यौपानेले जानकारी दिइन ।

पर्वतीय पर्यटनका विविध पक्ष अवलोकन गर्नका लागि सङ्ग्रहालय निर्माण गरिएको हो । हिमाली जीवनसँगै पर्वतीय पर्यटनका विविध पक्षलाई सङ्ग्रहालयमा नियाल्न पाइने भएकाले आकर्षक गन्तव्यका रूपमा विकास हुन थालेको छ ।

यहाँबाट हिमाली क्षेत्रमा बसोबास गर्ने जातजातिको रीतिरिवाज, वेशभूषा, कला, संस्कृतिका साथै भौगोलिक अवस्थालगायतका विषयमा जानकारी लिन पाउँछन् ।