मुगु । मुगुको सोरु गाउँपालिका ६ सोरुकोटका ४० वर्षीय लली कार्की घाँटीको गम्भीर रोगबाट पीडित छन् । काठमाडौं वीर अस्पतालको आईसीयूमा उपचार गरिरहेका उनी आर्थिक अभावले छटपटाइरहेका छन् ।

चिकित्सकको निगरानीमा रहेका उनको वीर अस्पतालको नयाँ भवनस्थित आईसीयूमा उपचार भइरहेको छ । कार्की यसअघि पनि उपचारका लागि भारत पुगेका थिए । भारतमा उपचार गराउँदा करिब सात लाख रुपैयाँ भन्दा बढी खर्च भएको आफन्तले बताए ।

हाल कार्कीको उपचारमा दैनिक ठूलो रकम खर्च भइरहेको छ । उनको औषधिका लागि मात्रै दैनिक १७ हजार रुपैयाँ भन्दा बढी खर्च हुने गरेको उपचारमा सहयोग गरिरहेका उनका आफ्‌न्त अक्कल बुढाले बताए ।

उपचार सुरु गर्ने क्रममा समेत रकम अभाव भएपछि मोबाइल फोन धरौटी राखेर पैसा सापटी लिई औषधि खरिद गर्नु परेको बुढाले बताए ।

कार्कीको जटिल अवस्था र परिवारको आर्थिक कमजोर अवस्थालाई ध्यानमा राख्दै सोरु गाउँपालिकाका शाही युवा शक्ति नेपालका महामन्त्री एवम अभियन्ता रेशमचन्द मल्ल र अर्का रोयर समरसहितले ‘ललि कार्की बचाउ अभियान’ सञ्चालन गर्दै आर्थिक सहयोग जुटाउन पहल गरिरहेका छन् । विभिन्न निकाय तथा मनकारी व्यक्तिहरूलाई उपचारका लागि सहयोग गर्न उनीहरूले आग्रह समेत गरेका छन ।

उपचारका क्रममा कार्कीका भान्जा कविराज कार्की समेत बिरामी परेका छन् । ललि कार्कीको उपचारका लागि काठमाडौं आएका कविराजको अचानक आन्द्रा फुटेपछि वीर अस्पतालमै शल्यक्रिया गरी उपचार भइरहेको हुदा थप समस्या आएको छ ।

आईसीयूमा रहेका कार्कीको हेरचाह, औषधि खरिद, रिपोर्ट ल्याउने–लैजाने तथा अस्पताल र अन्य पक्षसँग आवश्यक समन्वयको काम अक्कल बुढाले गरिरहेका छन् । आर्थिक सहयोग जुटाउने अभियानबाट हालसम्म करिब एक लाख रुपैयाँ संकलन भएपछि उपचारमा केही सहज भएको बुढाले जानकारी दिए ।

आईसीयूमा उपचाररत कार्कीको स्वास्थ्य अवस्थामा क्रमिक सुधार भइरहेको आफन्तले बताए । कार्कीको उपचारमा मात्र करिव ७ लाख अनुमान गरिएको बुढाले सुनाए । मृत्यूसँग लडिरहेका बिरामी ललिको उपचार अझै जारी रहेकाले आर्थिक सहयोगको लागि मनकारी ब्यक्ति निकायसंग परिवारले आग्रह गरेका छन ।

अक्कल बुढा सम्पर्क नम्बर ९८६४९६१७८८