मङ्गला गाउँपालिका–३ पखेर र वडा नम्बर २ सिमलचौर जोड्ने गरी म्याग्दी नदीमाथि पुल निर्माण गर्न गण्डकी प्रदेश सरकारले चालु आर्थिक वर्ष २०८३/८४ मा दुई करोड रुपैयाँ बजेट विनियोजन गरेको छ।

यसअघि बेलिब्रिज निर्माणको योजना बने पनि सवारीसाधनको चाप र जोखिमका कारण प्राविधिक रूपमा उपयुक्त नदेखिएपछि प्रदेश सरकारले पक्की पुल निर्माण अघि बढाउन लागेको हो। पुल निर्माणका लागि ७ करोड ५० लाख रुपैयाँको स्रोत सुनिश्चित भइसकेको पूर्वाधार विकास कार्यालय म्याग्दीले जनाएको छ।

कार्यालयका प्रमुख डा. महेन्द्र बानियाँका अनुसार ‘डिजाइन एन्ड बिल्ड’ विधिबाट पुल निर्माण गर्ने तयारी भइरहेको छ। यस विधिमा एउटै निर्माण कम्पनीले पुलको डिजाइन तयार पार्नुका साथै निर्माणको कामसमेत गर्नेछ।

बेनी–दरवाङ सडकको फापरखेतमा सडकको तल म्याग्दी नदी र माथिल्लो भागमा ठूलो पहिरो रहेकाले बर्खायाममा यातायात सञ्चालनमा समस्या हुँदै आएको छ। पछिल्लो दुई महिनामै पहिरो खस्ने क्रममा दुई वटा मालवाहक ट्रक म्याग्दी नदीमा खसेर दुर्घटना भएका छन्।

फापरखेत पहिरोका कारण मङ्गला, मालिका र धौलागिरि गाउँपालिकाका बासिन्दाको आवतजावतसँगै बिरामीलाई अस्पताल लैजान, दूध, तरकारी तथा फलफूल बजार पुर्‍याउन र दैनिक उपभोग्य तथा निर्माण सामग्री ढुवानीमा समेत समस्या हुँदै आएको छ।

पहिरोका कारण म्याग्दी नदीमा निर्माणाधीन जलविद्युत् आयोजना, डाँडाखेत–राहुघाट प्रसारण लाइन, सडक, भवन, खानेपानी र सिँचाइका आयोजनासमेत प्रभावित हुँदै आएका छन्।

सडकको माथिल्लो भागमा पहिरो नियन्त्रणका प्रयास सफल नभएपछि दीर्घकालीन विकल्पका रूपमा नदीमाथि पुल निर्माण गर्न लागिएको हो। पुल बनेपछि फापरखेतको जोखिमपूर्ण सडकखण्डलाई छल्दै बेनी–दरवाङ सडकमा सुरक्षित यातायात सञ्चालन हुने अपेक्षा गरिएको छ।