आफ्नै देशको रियल मड्रिडविरुद्ध समग्रमा १२–२ को एकतर्फी जित निकाल्दै स्पेनिस क्लब बार्सिलोना युईएफए महिला च्याम्पियन्स लिगको सेमिफाइनलमा प्रवेश गरेको छ ।

बुधबार क्याम्प नोउमा सम्पन्न क्वार्टरफाइनलको दोस्रो लेगमा घरेलु टोली बार्सिलोना ६–० ले विजयी भयो । पहिलो लेगमा टोलीले ६–२ को जित निकालेको थियो ।

बार्सिलोनालाई जित दिलाउन क्यारोलिन ग्राहम ह्यान्सेनले २ तथा एलेक्सिया पुटेलास, इरेन परेडेस, इवा पाजोर र एस्मी ब्रुग्ट्सले १–१ गोल गरे ।

खेलको आठौँ मिनेटमा पुटेलासको गोलमार्फत बार्सिलोनाले अग्रता लिएको थियो । ७ मिनेटपछि नै ह्यान्सेनले टोलीको अग्रता दोब्बर बनाइन् ।

परेडेसले २७औँ मिनेटमा गोल गर्दा बार्सिलोनाको अग्रता ३–० मा पुग्यो । ३४औँ मिनेटमा पाजोरले टोलीलाई ४–० ले अगाडि बढाइन् ।

ह्यान्सेनले ५५औँ मिनेटमा व्यक्तिगत दोस्रो तथा टोलीका लागि पाँचौँ गोल गरिन् । ७४औँ मिनेटमा ब्रुग्ट्सले बार्सिलोनाका लागि छैटौँ गोल गरिन् ।

बार्सिलोनाले सेमिफाइनलमा जर्मन क्लब बायर्न म्युनिखको सामना गर्नेछ । बायर्न इंग्लिस क्लब म्यानचेस्टर युनाइटेडलाई समग्रमा ५–३ ले पराजित गर्दै अन्तिम–४ मा पुगेको हो ।

यसैगरी, अर्को सेमिफाइनलमा इंग्लिस क्लब आर्सनलले फ्रान्सको लियोनको समान गर्नेछ । आर्सनलले चेल्सी तथा लियोनले उल्भ्सबर्गको चुनौती पन्छाउँदै सेमिफाइनलको यात्रा तय गरेका हुन् ।

प्रकाशित समय : १०:३७ बजे