अमेरिकी राष्ट्रिय मौसम सेवा, बाल्टिमोर/वाशिङ्टन कार्यालयले भर्जिनियाको फेयरफ्याक्स काउन्टी र आसपासका क्षेत्रका लागि भीषण हिउँ आँधीसम्बन्धी चेतावनी जारी गरेको छ। मौसम सेवाका अनुसार यो चेतावनी शनिबार राति ११ बजेदेखि सोमबार बिहान ४ बजेसम्म लागू हुनेछ।

मौसम पूर्वानुमानअनुसार शनिबार बेलुकाबाट हिउँ पर्न सुरु भई रातभरि भारी हिउँ पर्ने सम्भावना रहेको छ। आइतबार केही समय हिउँसँगै वर्षा पनि हुन सक्ने अनुमान गरिएको छ, जसका कारण सडकहरू अत्यन्तै चिप्लो र जोखिमपूर्ण बन्नेछन्।

शहर क्षेत्रहरूमा ६ देखि १० इन्चसम्म हिउँ पर्ने सम्भावना रहेको छ भने बाहिरी तथा उचाइ भएका क्षेत्रमा अझ बढी हिउँ जम्न सक्ने मौसम सेवाले जनाएको छ। आँधीपछि तापक्रम निकै घट्ने भएकाले जमेको हिउँ र बरफका कारण सडक यात्रा थप चुनौतीपूर्ण हुने चेतावनी दिइएको छ।

यसैबीच, स्थानीय प्रशासनले सार्वजनिक सुरक्षालाई ध्यानमा राख्दै आपतकालीन अवस्था घोषणा गरिसकेको छ। हिउँ आँधीको समयमा फेयरफ्याक्स कनेक्टर बस सेवा स्थगित गरिने जानकारी दिइएको छ भने अन्य सार्वजनिक यातायात सेवाहरू पनि सीमित रूपमा सञ्चालन हुने बताइएको छ।

अधिकारीहरूले स्थानीय बासिन्दालाई सकेसम्म घरमै बस्न, अनावश्यक यात्रा नगर्न तथा खाद्य सामग्री, पिउने पानी, औषधि जस्ता आवश्यक वस्तुहरू अग्रिम रूपमा तयारी अवस्थामा राख्न आग्रह गरेका छन्। साथै वृद्धवृद्धा, अशक्त तथा जोखिममा रहेका व्यक्तिहरूको विशेष ख्याल राख्न अनुरोध गरिएको छ।

प्रकाशित समय : ११:३६ बजे