गत असोजको बाढीमा बाबुछोरीलाई बचाउने चणिकलाल गणतन्त्र दिवसका दिन सम्मानित हुने
वि.सं.२०८२ जेठ १० शनिवार १५:०९
shares

काठमाडौँ । बागमती प्रदेश सरकारले गत असोजमा आएको बाढीमा बगेका दुई जनालाई उद्धार गरेका काभ्रेपलाञ्चोकका युवकलाई डेढ लाख पुरस्कारसहित सम्मान गर्ने भएको छ ।
प्रदेश सरकारले बाढीमा बगेका मानिसहरुको उद्धार गरेका काभ्रेपलाञ्चोकको तेमाल गाउँपालिका–९ का चणिकलाल तामाङलाई गणतन्त्र दिवसको अवसर पारेर १ लाख ५० हजार पुरस्कार दिने भएको हो । तामाङले गत असोजमा ललितपुरको नख्खु खोलामा आएको बाढीले बगाएका बाबुछोरीको उद्धार गरि बचाएका थिए ।
रौतहट घर भई ललितपुर महानगरपालिका–२५ सुगम बस्ती टोल बस्ने ४३ वर्षीय राजु शाह र उनकी ६ वर्षीया छोरी मेघनालाई गत असोजमा नख्खु खोलामा आएको बाढीले बगाएको थियो । बाढी आएपछि घरको छानामा चढेका उनीहरुलाई बाढीले घरसहित बगाएर करिव ३ सय मिटर तल पु¥याईसकेको अवस्थामा तामाङले बाढीमै पसेर उनीहरुको सकुशल उद्धार गरेका थिए ।
सोही साहसिक कार्यका लागि प्रदेश सरकारले दिवसको अवसरमा जेठ १५ गते नगद पुरस्कार सहित सम्मान गर्ने निर्णय गरेको प्रदेश सरकारका प्रवक्ता एवम् आन्तरिक मामिला तथा कानुनमन्त्री सुरजचन्द्र लामिछानेले जानकारी दिए।

























