एनएमबी बैंकले विश्व क्रिकेट लिग-२ मा उत्कृष्ट प्रदर्शन गरेबापत सहभागी टिमको १६ जनालाई सम्मान र हौसलास्वरुप जनही नगद २१ हजार प्रदान गर्ने घोषणा गरेको छ ।

प्रतिभाशाली खेलाडीहरुलाई सम्मान र हौसला प्रदान गर्ने मनसायले यो निर्णय गरेकाे बैंकका प्रमुख कार्यकारी अधिकृत सुनील केसीले बताए । उनले भने, ‘खेलाडीहरु राष्ट्रका गौरव हुन् । खेलाडीको मनोबल उच्च कायम राखिरहन सकेमा मात्र खेलाडी र खेलकुद जगतको प्रगति हुने कुरालाई मध्यनजर गर्दै हामीले प्राेत्साहनस्वरूप सम्मान गर्न लागेका हाैं ।’

सन् २०१९ देखि सुरु भएको यस विश्व क्रिकेट लिग-२ को कुल ३५ खेलमा १८ वटा म्याचमा जित हात पारेर नेपाल भोलि हुन गइरहेको फाइनल म्याचमा युएईसँग भिडदैछ । भोलिको खेलमा जित हात पारेमा नेपाल सिधै ग्लोबल क्वालिफायरमा छनोट हुनेछ । जसमा नेपालले पहिलो पटक विभिन्न टेस्ट राष्ट्रसँग खेल्ने मौका पनि पाउनेछ ।

यो नगद पुरस्कारले पनि भोलिको खेलमा अझै उत्कृष्ट प्रदर्शन गर्न प्रोत्साहित गर्नेछ भन्ने विश्वास बैंकले लिएको छ । सो पुरस्कार रकम सबै १६ खेलाडीको नाममा बैंकमा खाता खोली उक्त खातामार्फत हस्तान्तरण गरिने बैंकका कार्यकारी अधिकृतले केसीले बताए ।