अघिल्लो आर्थिक वर्षको वित्तीय प्रणालीमा पर्याप्त तरलता हुँदा पनि बैंकहरूको खुद नाफा करिब २० प्रतिशतले मात्र बढेको थियो । तर लगानीयोग्य रकम नभएकाले बजार मागअनुसार कर्जा प्रवाह नहुँदा पनि यसपाली वाणिज्य बैंकहरूको खुद नाफा करिब २३ प्रतिशतले बढेको छ ।

गत आर्थिक वर्षको पछिल्लो ६ महिनामा बैंक तथा वित्तीय संस्थाले नयाँ कर्जा प्रवाह गर्न पाएनन् ।

नियामक निकायको निर्देशनअनुसार अनिवार्य नगद मौज्दात (सीआरआर) र कर्जा निक्षेप अनुपात (सीडी) कायम गर्न पनि राष्ट्र बैंकबाट ठूलो परिमाणमा अल्पकालीन सापटी लिनुपर्‍यो । तर समग्रमा बैंकहरूको वार्षिक खुद नाफाको वृद्धिदर भने अघिल्लो वर्षको तुलनामा थप सवा तीन प्रतिशत विन्दुले बढेको बैंकहरूले प्रकाशन गरेको गत आर्थिक वर्षको चौथो त्रैमासको अपरिष्कृत वित्तीय विवरणमा उल्लेख छ ।

गत आर्थिक वर्षमा २६ वटा वाणिज्य बैंकले कुल ७४ अर्ब ८० करोड रुपैयाँ खुद नाफा गरेका छन् । गत आर्थिक वर्षमा सबै बैंकको खुद नाफा १ अर्ब रुपैयाँभन्दा माथि छ । यसअनुसार ५ अर्ब २१ करोड रुपैयाँ खुद नाफा कमाएर राष्ट्रिय वाणिज्य बैंक पहिलो बनेको छ भने १ अर्ब ३५ करोड नाफासहित सेन्चुरी बैंक सबैभन्दा पछि छ ।

प्रकाशित समय : १०:२४ बजे