नेपाल कम्युनिष्ट पार्टी (नेकपा)को आन्तरिक विवादले नयाँ मोड लिएको छ । यसअघि अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल समूहमा रहेका उपाध्यक्ष बामदेव गौतम प्रधानमन्त्री एवं अर्का अध्यक्ष केपीतिर लागेका छन् । योसँगै नेकपामा नयाँ समीकरणको संकेत देखिएको छ ।

ओलीलाई एकता महाधिवेशनसम्म अध्यक्ष र प्रतिनिधिसभाको यस कार्यकाल अवधिभर प्रधानन्त्रीको जिम्मेवारीमा राख्ने गौतमले प्रस्ताव अघि सारेका हुन् । तत्काल महाधिवेशन गर्नेदेखि मन्त्री परिवर्तनसम्मका कुरा उनीद्वारा प्रस्तुत ६ बुँदे प्रस्तावमा समावेश छ । अर्को अध्यक्ष प्रचण्ड एकता महाधिवेशनसम्म कार्यकारी अध्यक्ष रहने गौतमको  प्रस्ताव छ ।

पार्टीको एकता महाधिवेशन सहमतिमा आयोजना गर्नुपर्ने समेत उनले बताएका छन् । प्रधानमन्त्रीका कामहरुको पार्टीले हस्तक्षर नगर्ने तर, सरकारले राष्टिय तथा अन्तर्राष्ट्रिय महत्वको विषयमा निर्णय गर्नुपूर्व पार्टी सचिवालयसँग परामर्श गर्नुपर्ने गौतमको प्रस्ताव छ । उनले प्रशासन तथा सुरक्षा निकायका कर्मचारिको पदोन्नति र सरुवाका लागि मापदण्ड निश्चित गरी कार्यानवयन गर्नुपर्ने, पार्टी केन्द्रीय सचिवलायको सुझाव र परामर्शमा मन्त्रिपरिषद पुनर्गठन तथा राजनीतिक तथा संवैधानिक नियुक्ति गर्नुपर्ने र संसदमा नीति तथा कार्यक्रम र बजेट प्रस्तुत गर्नुपूर्व सचिवालयमा परामर्श गर्नुपर्ने बताएका छन् । पार्टीको बैठक पार्टी कार्यालयमा गर्नुपर्ने समेत उपाध्यक्ष गाैतमको माग छ ।

उनले स्थायी कमिटीको बैठकमा प्रधानमन्त्री ओलीको निर्देशनमा नेकपा एमाले पार्टी दर्ता भएको आरोप लगाउदै दुवै पदबाट राजीनामा दिनुपर्ने माग गरेका थिए । तर, पछिल्लो दिनहरुमा उनी आफ्नो भनाइबाट पछि हटेका छन् । अहिलेको विवाद समाधानका लागि आफूले सो प्रस्ताव अघि सारेको गौतमले बताएको भनाइ छ । यद्यपि उनको प्रस्तावहरू ओलीले लिँदै आएको अडानलाई समर्थन गर्ने किसिमका छन् । अहिले बालुवाटारमा भइरहेका दुवै छलफलमा सहभागी नहुने पनि बामदेवले बताएको उनीनिकट स्रोतले जनाएको छ ।

गाैतमले ओलीतिर ‘कोल्टो फेरे’सँगै ९ सदस्यीय सचिवालयमा अब प्रचण्ड-नेपाल पक्षका ५ र ओली पक्षमा चार नेता भएका छन् । तर ओली पक्षले भने गृहमन्त्री रामबहादुर थापा पनि आफूहरूसँगै रहेको दाबी गरेका छन् । सो दाबी सत्य भएमा अब नेकपा सचिवालयमा प्रधानमन्त्री एवं अध्यक्ष ओलीको पक्षमा बहुमत पुग्नेछ ।

उपाध्यक्ष गाैतमद्वारा प्रस्तुत प्रस्ताव :

प्रकाशित समय : १८:४४ बजे