दोस्रो संस्करणको मिस्टर एन्ड मिस टिन वर्ल्ड नेपाल प्रतियोगिता आयोजना हुने भएको छ । प्रतियोगिताका लागि १७ जुलाइमा द ब्रिटिस कलेज थापाथलीबाट अडिसनमार्फत् सर्टलिस्ट तयार गरिने आयोजक फेलिज इन्टरनेशनलले जनाएको छ । 

प्रतियोगितामा १६ देखि २१ वर्ष उमेर समूहका युवाहरुले सहभागिता जनाउन पाउने छन् । एसईई तथ प्लस टु परीक्षा दिएर बसेका विद्यार्थीहरुको फुर्सदलाई उपयोग गर्दै प्रतियोगिताबाट  उत्पादनशील बनाउन सकिने आयोजकको भनाइ छ । 

पूर्वमिस नेपाल उषा खड्गी, नायक सलोन बस्नेत, सलिनमान बानियाँ, मोडल पुजा गिरी र कोरियोग्राफर रोजिन शाक्य निर्णायक मण्डलमा रहेका छन् । 

प्रतियोगिताको विजेताले टर्कीएको राजधानी इस्तानबुलमा आयोजना हुने टप मोडल अफ युनिभर्समा  सहभागिता जनाउन पाउने छन् । सो प्रतियोगिता १० अक्टोबर २०२२ मा टर्कीएको इस्तानबुलमा आयोजना हुने छ । 

यस्तै, विजेताले प्रतियोगिताको नलेज पार्टनर रहेको द ब्रिटिस कलेजमा २० लाख रुपैयाँसम्मको छात्रवृत्ति पाउने छन् । यस्तैगरी आयोजकको तर्फबाट १ लाख तथा विभिन्न उपहारसमेत प्राप्त गर्ने आयोजकले काठमाडौँमा आयोजित पत्रकार सम्मेलनमार्फत् जनाएको छ । फर्स्ट रनरअप तथा सेकेन्ड रनरअपले कलेजको तर्फबाट १५ लाखसम्मको छात्रवृत्ति पाउनेछन् भने सबै सहभागीले पहिलो वर्षमा ५० प्रतिशत छात्रवृत्ति प्राप्त गर्ने छन् । 

पहिलो संस्करणमा मिस्टर टिनतर्फ पंकजसिंह ठकुरी तथा मिस टिनतर्फ स्वस्ती वैद्यले उपाधि जितेका थिए । २०१७ को विजेताले ब्राजिलमा भएको मिस टिन तथा मिस्टर टिन वर्ल्डमा सहभागिता जनाएको थियो । जसमा ठकुरीले फर्स्ट रनरअप भएका थिए भने मिस टिन वैद्यले बेस्ट स्माइल तथा बेस्ट नेसनल कस्ट्युम टाइटल हात पारेकी थिइन् ।