नेकपा (माओवादी केन्द्र)ले सरकारको तर्फबाट संघीय संसदमा पेस हुने आगामी आर्थिक वर्षको नीति तथा कार्यक्रम र बजेटको छलफलमा सक्रियतापूर्वक सहभागी हुन आफ्ना सांसद्लाई निर्देशन दिएको छ ।

सिंहदरबारमा आज बसेको माओवादी केन्द्रको संसदीय दलको बैठकमा संसदीय दलका नेतासमेत रहेका पार्टी अध्यक्ष पुष्पकमल दाहाल ‘प्रचण्ड’ले सरकारको तर्फबाट प्रस्तुत हुने नीति तथा कार्यक्रम र बजेटमाथिको छलफलमा सक्रियताका साथ रचनात्मक तवरले भाग लिन सांसद्लाई निर्देशन दिए ।

अध्यक्ष प्रचण्डले आगामी आर्थिक वर्षको नीति तथा कार्यक्रमले लिन लागेको नीति र लक्ष्यका बारेमा सांसद्लाई जानकारी गराएका थिए । बैठकमा अध्यक्ष प्रचण्डले दिएको निर्देशन उद्धृत गर्दै संसदीय दलका प्रमुख सचेतक देवप्रसाद गुरुङले सक्रियताका साथ छलफल प्रक्रियामा भाग लिन र विषय वस्तुको गम्भीरतालाई बुझेर काम गर्न सांसद्लाई निर्देशन दिएका थिए ।

बैठकमा अर्थमन्त्री जनार्दन शर्माले  सांसद्ले दिएको सुझावका आधारमा आगामी आर्थिक वर्षको बजेट तयार गरिएको जानकारी गराएका थिए । 

प्रकाशित समय : २३:२९ बजे