सरकारी स्वामित्वको नेपाल आयल निगमले विगत ४ वर्षमा पेट्रोलियम पदार्थको मूल्य झन्डै दोब्बर बढाएको छ । अन्तर्राष्ट्रिय बजारमा कच्चा तेलको मूल्य बढेसँगै पेट्रोलियम पदार्थको पनि मूल्य बढाउनुपरेको निगमले बताउँदै आएको छ । तर, अन्तर्राष्ट्रिय बजारमा कच्चा तेलको मूल्य घटेका बेला पनि निगमले न्यून मात्रामा मूल्य समायोजन गर्दै आएको छ । पछिल्लो पटक पेट्रोलको मूल्य प्रतिलिटर १ सय ७० रुपैयाँ कायम हुँदा २०७४ साल कात्तिक १५ गते १ सय रुपैयाँ मात्र थियो ।

निगमले पेट्रोलियम पदार्थमा मूल्यवृद्धि गरेसँगै त्यसको प्रत्यक्ष असर सर्वसाधारणको चुल्होचौकोसम्म परेको छ । ढुवानी भाडा महँगिएसँगै दैनिक उपभोग्य सामग्रीको मूल्य ह्वात्तै बढेको छ । यसले सर्वसाधारणको दैनिकीसमेत असहज बनिरहेको छ । अन्तर्राष्ट्रिय बजारमा भाउ बढेका बेला मूल्य समायोजन गर्ने तर घटेका बेला त्यसलाई निरन्तरता नदिने निगमको प्रवृत्तिप्रति सर्वसाधारणले गुनासो गर्दै आएका छन् ।

गत वर्ष प्रधानमन्त्री केपी शर्मा ओली नेतृत्वको सरकारले सत्ता छाड्नुअघि सार्वजनिक भाडा २९ प्रतिशत बढाएको थियो । त्यसपछि प्रधानमन्त्री शेरबहादुर देउवा नेतृत्वको सरकारले पेट्रोलियम पदार्थमा मूल्य बढाउँदै लगेपछि हालसम्म सार्वजनिक यातायातको भाडा ५४ प्रतिशत बढाइएको छ । यसले गर्दा सर्वसाधारणको दैनिकीमा असर परिरहेको छ ।

आयल निगमले अचाक्ली मूल्य बढाएसँगै त्यसको विरोधमा सर्वसाधारणदेखि विभिन्न संघ–संगठनहरूले तत्काल मूल्य वृद्धि फिर्ता लिन माग गरिरहेका छन् । शुक्रबार मात्रै मूल्यवृद्धिको विरोधमा नेपाल कम्युनिस्ट पार्टी क्रान्तिकारीको जनवर्गीय संगठनहरूको आयोजनामा काठमाडौंको टेकुस्थित आयल निगमको केन्द्रीय कार्यालय घेराउ गरिएको छ । विरोधमा प्रदर्शनमा सहभागीले सरकारले हालै बढाएको पेट्रोलियम पदार्थको मूल्यवृद्धि तत्काल फिर्ता लिन माग गरेका छन् । सरकारले जनतालाई कष्ट दिने काम गरिरहेकाले मूल्यवृद्धिविरुद्ध विरोध प्रदर्शन गरिएको ती संगठनले बताएका छन् ।

पछिल्लो पटक डिजल र मट्टीतेल प्रतिलिटर १५३ पुगेको छ, जबकि चार वर्षअघि यो मूल्य ७५ रुपैयाँ मात्र थियो । चार वर्षमा निगमले पेट्रोलियमको मूल्यवृद्धि २९ पटक वृद्धि गरेको छ । निगमले पेट्रोलियम पदार्थमा मूल्य बढाएसँगै सर्वसाधारणले थेग्नै नसक्ने गरी अन्य वस्तुको बजार भाउ अकासिनुका साथै सार्वजनिक यातायातको भाडा बढेको छ । मूल्यवृद्धिविरुद्ध विद्यार्थीदेखि सर्वसाधारणसमेत आन्दोलित भइरहेका छन् ।

अखिल नेपाल राष्ट्रिय स्वतन्त्र विद्यार्थी युनियनकी केन्द्रीय उपाध्यक्ष शिलु न्यौपानेले सरकारले जनतालाई कष्ट दिने काम गरिरहेकाले मूल्यवृद्धिविरुद्ध विरोध प्रदर्शन गर्नुपरेको बताइन् । यस्तै, मजदुर नेता अर्जुनलाल श्रेष्ठले चुनावलगत्तै जनताको ढाड सेक्ने गरी सरकारले पेट्रोलियम पदार्थको मूल्य बढाएपछि आन्दोलनमा होमिनुपरेको जनाए । मूल्यवृद्धि फिर्ता लिन सरकारलाई खबरदारी गरिरहने उनको भनाइ छ । निगमले सबैभन्दा बढी गत वर्ष २०७८ मा १४ पटक मूल्य बढाएको छ भने २०७७ मा तीन पटक मूल्यवृद्धि गरेको तथ्यांकले देखाउँछ । २०७४ मा ६ पटक र २०७५ मा ५ पटक पेट्रोलियमको मूल्यवृद्धि भएको छ । पछिल्लो पटक स्थानीय तहको निर्वाचन सकिएको भोलिपल्ट अर्थात् वैशाख ३१ मा पेट्रोलियमको मूल्यमा अत्यधिक वृद्धि गरेपछि निगमको सर्वत्र आलोचना भइरहेको छ ।

निगमले विगत ४ वर्षमा पेट्रोलियम पदार्थको मूल्य झन्डै दोब्बर बढाएको छ । पछिल्लो पटक पेट्रोलको मूल्य प्रतिलिटर १ सय ७० रुपैयाँ कायम हुँदा २०७४ साल कात्तिक १५ गते १ सय रुपैयाँ मात्र थियो । निगमले सबैभन्दा बढी गत वर्ष २०७८ मा १४ पटक मूल्य बढाएको छ भने २०७७ मा तीन पटक मूल्यवृद्धि गरेको निगमको तथ्यांकले देखाउँछ । २०७४ मा ६ पटक र २०७५ मा ५ पटक पेट्रोलियमको मूल्यवृद्धि भएको छ ।

कहिले कति मूल्यवृद्धि ?

२०७४  
कात्तिक १५ गते पेट्रोलको मूल्य प्रतिलिटर १ सय, डिजल ७५ र मट्टीतेल ७५ रुपैयाँ
पुस ४ गते पेट्रोलको मूल्य प्रतिलिटर १ सय १, डिजल ७८, मट्टीतेल ७८ रुपैयाँ
पुस १७ गते पेट्रोलको मूल्य प्रतिलिटर १ सय २, डिजल ७९ र मट्टीतेल ७९ रुपैयाँ
माघ ३ गते पेट्रोलको मूल्य प्रतिलिटर १ सय ३, डिजल ८१ र मट्टीतेल ८१ रुपैयाँ
माघ १८ गते पेट्रोलको मूल्य प्रतिलिटर १ सय ४, डिजल ८३ र मट्टीतेल ८३ रुपैयाँ
चैत १९ गते पेट्रोलको मूल्य प्रतिलिटर १ सय ५, डिजल ८५ र मट्टीतेल ८५ रुपैयाँ

२०७५
वैशाख ३ गते पेट्रोलको मूल्य प्रतिलिटर १ सय ६, डिजल ८७ र मट्टीतेल ८७ रुपैयाँ
वैशाख १९ गते पेट्रोलको मूल्य प्रतिलिटर १ सय ८, डिजल ९० र मट्टीतेल ९० रुपैयाँ
जेठ २ गते पेट्रोलको मूल्य प्रतिलिटर १ सय १०, डिजल ९२ र मट्टीतेल ९२ रुपैयाँ
जेठ १९ गते पेट्रोलको मूल्य प्रतिलिटर १ सय १३, डिजल ९५ र मट्टीतेल ९५ रुपैयाँ
असोज १ गते पेट्रोलको मूल्य प्रतिलिटर १ सय १४, डिजल १०१ र मट्टीतेल १०१ रुपैयाँ

२०७७
फागुन १७ गते पेट्रोलको मूल्य प्रतिलिटर १ सय १६, डिजल ९९ र मट्टीतेल ९९ रुपैयाँ
चैत ३ गते पेट्रोलको मूल्य प्रतिलिटर १ सय १८, डिजल १०१ र मट्टीतेल १ सय १ रुपैयाँ
चैत २२ गते पेट्रोलको मूल्य प्रतिलिटर १ सय २०, डिजल १ सय ३ र  मट्टीतेल १ सय ३ रुपैयाँ

२०७८
वैशाख ४ गते पेट्रोलको मूल्य प्रतिलिटर १ सय २१, डिजल १ सय ४ र मट्टीतेल १ सय ४ रुपैयाँ
जेठ २ गते पेट्रोलको मूल्य प्रतिलिटर १ सय २३, डिजल १०६ र मट्टीतेल १ सय ६ रुपैयाँ
जेठ २२ गते पेट्रोलको मूल्य प्रतिलिटर १ सय २५, डिजल १०८ र मट्टीतेल १ सय ८ रुपैयाँ
असार ९ गते पेट्रोलको मूल्य प्रतिलिटर १ सय २७, डिजल १ सय १० र मट्टीतेल १ सय १० रुपैयाँ
असार २२ गते पेट्रोलको मूल्य प्रतिलिटर १ सय २९, डिजल १ सय १२ र मट्टीतेल १ सय १२ रुपैयाँ
भदौ ७ गते पेट्रोलको मूल्य प्रतिलिटर १ सय ३०, डिजल १ सय १३ र मट्टीतेल १ सय १३ रुपैयाँ
कात्तिक १२ गते पेट्रोलको मूल्य प्रतिलिटर १ सय ३३, डिजल १ सय १६ र मट्टीतेल १ सय १६ रुपैयाँ
कात्तिक २४ गते पेट्रोलको मूल्य प्रतिलिटर १ सय ३६, डिजल १ सय १९ र मट्टीतेल १ सय १९ रुपैयाँ
माघ ५ गते पेट्रोलको मूल्य प्रतिलिटर १ सय ३९, डिजल १ सय १२ र मट्टीतेल १ सय १२ रुपैयाँ
माघ १८ गते पेट्रोलको मूल्य प्रतिलिटर १ सय ४२, डिजल १ सय २५ र मट्टीतेल १ सय २५ रुपैयाँ
फागुन ७ गते पेट्रोलको मूल्य प्रतिलिटर १ सय ४५, डिजल १ सय २८ र मट्टीतेल १ सय २८ रुपैयाँ
फागुन १९ गते पेट्रोलको मूल्य प्रतिलिटर १ सय ५०, डिजल १ सय ३३ र मट्टीतेल १ सय ३३ रुपैयाँ
चैत २ गते पेट्रोलको मूल्य प्रतिलिटर १ सय ५५, डिजल १ सय ३८ र मट्टीतेल १ सय ३८ रुपैयाँ
चैत २२ गते पेट्रोलको मूल्य प्रतिलिटर १ सय ६०, डिजल १ सय ४३ र मट्टीतेल १ सय ४३ रुपैयाँ

२०७९
वैशाख ३१ गते पेट्रोलको मूल्य प्रतिलिटर १ सय ७०, डिजल १ सय ५३ र मट्टीतेल १ सय ५३ रुपैयाँ

(नेपाल न्यूज बैंक)

प्रकाशित समय : २०:५४ बजे