धनगढीमा जारी ‘मुख्यमन्त्री राष्ट्रिय पुरुष कबड्डी’ प्रतियोगिताको विभागीय टोली नेपाल आर्मी क्लब र सुदूरपश्चिम प्रदेश सेमिफाइनलमा प्रवेश गरेका छन् । अखिल नेपाल कबड्डी संघको आयोजनामा सुरु भएको सो प्रतियोगितामा ती दुई विभागीय टोलीले पहिलो दिनका दुवै खेलमा जीत हात पार्दै अन्तिम चारणमा स्थान बनाएका हुन् । पहिलो खेलमा नेपाल आर्मीले गण्डकी प्रदेशलाई ९१-३२ ले हरायो भने पाँचौँ खेलमा कर्णाली प्रदेशलाई ६९-९ ले किनारा लगायो ।

त्यस्तै सुदूरपश्चिम प्रदेशले कर्णाली प्रदेशलाई ६६-२७ ले हराउँदा छैटौँ खेलमा गण्डकी प्रदेशलाई ५६-१८ ले हरायो । सोमबार नै भएका खेलमा नेपाल एपीएफ क्लब र मधेस प्रदेश पनि विजयी भएका छन् । नेपाल एपीएफ क्लबले लुम्बिनी प्रदेशलाई ५३-२२ ले हरायो भने मधेस प्रदेशले बागमती प्रदेशलाई ३६-२९ ले किनारा लगायो ।

प्रतियोगितामा आजै लिग चरणका खेल हुनेछन् । प्रतियोगिता लिगकम नकआउटका आधारमा सञ्चालन भइरहेको छ । प्रतियोगिताको विजेताले नगद रु एक लाख ५० हजार उपविजेताले नगद ८० हजार रुपैयाँ र सेमिफाइनल पुगेका दुई टोली नगद ४० रुपैयाँ हजारसहित ट्रफी, मेडल र प्रमाणपत्र पाउनेछ ।

प्रतियोगिताको सुदूरपश्चिम प्रदेश सरकारका सामाजिक विकास राज्यमन्त्री टेकबहादुर रैकाले सुरु गरे । सुदूरपश्चिम खेलकुद परिषद् मुख्य प्रर्वद्धक रहेको प्रतियोगिता देशकै सर्वाधिक धनराशिको प्रतियोगिता रहेको आयोजकको दाबी छ ।

प्रकाशित समय : २१:०४ बजे