पुस ७, २०७४ प्रदेश तथा प्रतिनिधि सभा निर्वाचनपछि पहिलो पटक एमालेको स्थायी समिति बैठक ललितपुरको भैसेपाटीस्थित उपाध्यक्ष बामदेव गौतमको निवासमा अपरान्ह बस्ने भएको छ । पार्टी एकीकरण तथा आगामी सरकार गठन लगायत बिषयमा छलफल गर्न एमाले स्थायी समिति निर्वाचनपछि पहिलो पटक बैठक बस्ने लागेको हो । बैठकमा माओवादी केन्द्रसँगको पार्टी एकताको स्वरुपबारे छलफल हुनेछ ।

आगामी सरकार गठन अघि देखिएको जटिलता, राष्ट्रिय सभा सदस्य निर्वाचनसम्बन्धी अध्यादेशमाथिको विवाद लगायत बिषयमा समेत छलफल हुने सचिव योगेश भट्टराईले जानकारी दिनुभयो । चुनावपछि पहिलो पटक बस्न लागेको बैठकले समग्र चुनावको समिक्षा पनि गर्नेछ । यसअघि माओवादी केन्द्रले दुई दिनअघि पार्टी हेडक्वार्टरको बैठकबाट छिटो एकताअघि बढाउने निर्णय गरेको थियो ।

माओवादीले पार्टी एकताको खाका बनाउने जिम्मा नेतृत्वलाई दिएको छ । नेकपा एमाले र माओवादी केन्द्रले पार्टी एकता गर्ने तयारी गरिरहदा नेतृत्वको खाका भने तयार भएको छैन । पार्टी एकीकरणको विशेष अवस्थामा दुई दलका प्रमुख नेताले संयुक्त नेतृत्व गर्ने गरी पार्टी एकता गर्ने विकल्पमा समेत चर्चा भइरहेको छ

प्रकाशित समय : ०९:५० बजे