प्रमुख प्रतिपक्षी दल नेपाली कांग्रेसले आज सरकारविरुद्ध देशभर प्रदर्शन गर्दैछ । कांग्रेसले वर्तमान ओली सरकार अधिनायकवाद उन्मुख बनेको, महँगी नियन्त्रणमा चासो नदिएको भन्दै सबै जिल्लामा प्रदर्शन गर्न लागेको हो ।

जिल्लामा सदरमुकाम र ठूला सहरकेन्द्रित आन्दोलन हुने र काठमाडौँमा दिउँसो साढे २ बजे बृहत प्रदर्शन गर्ने तयारी रहेको नेपाली कांग्रेसले जनाएको छ । कांग्रेसको भाषामा सरकारको अधिनायकवादी शैली र महँगीविरुद्ध भन्दै नेविसंघले यसअघि बालुवाटार घेराउसहित सामान्य विरोध गर्दै आएको थियो । आजबाट देशभर कांग्रेसले विरोध सुरु गरेको कांग्रेस प्रवक्ता विश्वप्रकाश शर्माले बताए ।

सरकारले काठमाडौंको रत्नपार्क, माइतीघर क्षेत्रमा प्रदर्शन गर्न रोक लगाएको छ । कांग्रेसले त्यसको विरोध गर्दै सोही स्थानबाट प्रदर्शन गर्न लागेको छ । डा गोविन्द केसीको मागलाई लिएर सडक र सदनमा आवाज उठाएको नेपाली कांग्रेस केसी र सरकारबीच सहमति भएसँगै महंगी नियन्त्रणको मुद्दा लिएर सरकारविरुद्ध सडकमा उत्रिन लागेको हो ।