नेत्रविक्रम चन्द विप्लव नेतृत्वको नेपाल कम्युनिस्ट पार्टीका पोलिटब्युरो सदस्य ओमप्रकाश पुन बर्दियाबाट पक्राउ परेका छन् । बर्दियामा मंगलबार पक्राउ परेका पुनलाई राति नै कैलाली ल्याइएको जिल्ला प्रहरी कार्यालयका प्रमुख प्रहरी उपरीक्षक विनोद घिमिरेले जानकारी दिए ।

उनीविरुद्ध कैलालीको घोडाघोडी नगरपालिकाका प्रमुख ममताप्रकाश चौधरीमाथि गोली प्रहार गरेको अभियोगमा मुद्दा दर्ता गरेको प्रहरीले जनाएको छ । प्रमुख चौधरीमाथि फागुनमा घरमै गोली प्रहार भएको थियो । सो क्रममा विप्लवका अन्य चारजना कार्यकर्तालाई नियन्त्रणमा लिएर छाडिएको थियो ।

‘मगलवार राति कैलाली ल्याएर हिरासतमा राखेका छौं,’ घिमिरेले भने, ‘मेयरलाई गोली हानेको अभियोगमा पुनविरुद्ध मुद्धा दर्ता छ । त्यसको लागि अदालतमा पेस गर्छौं ।’

पुनलाई करिब दुई साताअघि सर्वोच्च अदालतले रिहा गर्न आदेश दिए पनि अदालतपरिसरबाटै प्रहरीले पक्राउ गरी जिल्ला प्रहरी कार्यालय बर्दियालाई बुझाएको थियो । बर्दिया जिल्ला अदालतले पनि पुनलाई रिहा गर्न आदेश दिएको थियो । तर, प्रहरीले पुनः प्रहरीले पक्राउ गरी कैलाली प्रहरीलाई बुझाएको छ । विप्लवले भने बिनाकारण र बिनाआधार आफ्ना नेता-कार्यकर्तालाई पक्राउ गर्न थालेको आरोप लगाउँदै आएको छ ।