उत्तरपश्चिमी टर्कीमा आइतबार बिहान यात्रुवाहक रेल दुर्घटना हुँदा २४ व्यक्तिको मृत्यु भएको छ । दुर्घटनामा २४ जनाको मृत्यु भएको उपप्रधानमन्त्री रेसेप आक्दाङ्ले पुष्टि गरेका हुन् ।

यात्रुवाहक रेलका डिब्बाहरु पटरीबाट छुट्टिएपछि भएको दुर्घटनामा अन्य रेलमा रहेका सयौं यात्रु घाइते भएका छन् । भारी वर्षाका कारण दुर्घटना भएको अनुमान गरिएको छ ।

रेलमा ३ सय ६० भन्दा बढी यात्रु सवार रहेको बताइएको छ । रेल आइतबार इस्तानबुलको हालकाली स्टेसनबाट ग्रिस र बुल्ग्रेरियाको सीमानजिकको एदिरर्ने क्षेत्रमा यात्रा गरिरहेको अवस्थामा दुर्घटनाग्रस्त भएको थियो ।

टर्कीका सञ्चारमाध्यमले स्वास्थ्यमन्त्री अहमत देमिक्र्यानलाई उद्धृत गर्दै दुर्घटनामा घाइते भएका ३३८ व्यक्तिलाई उपचारका लागि अस्पताल भर्ना गरिएको बताएका छन् । भारी वर्षाको कारण चिप्लिएर रेलका डिब्बाहरु पटरीबाट बाहिर खस्न पुगेकोले यो दुर्घटना भएको यातायात मन्त्रालयले जानकारी दिएको छ ।

(रासस/एएफपी)

प्रकाशित समय : २३:०५ बजे