प्रदेश ७ को मुख्यमन्त्री तथा मन्त्रिपरिषदको कार्यालयमा बसेको बैठकले बोगटान गाउँपालिकाको नाम ‘बोगटान फुडसिल’ राख्ने निर्णय गरेको छ । प्रदेश सरकारले गाउँपालिकाको नयाँ नाम कायम गर्न केन्द्र सरकारसमक्ष सिफारिस गर्ने निर्णय गरेको छ ।

स्थानीय जनताको माग र गाउँसभाको बैठकले गरेको निर्णयअनुसार केन्द्र सरकारलाई सिफारिस गर्ने प्रदेश सरकारका प्रवक्ता एवं आन्तरिक मामिला तथा कानुनमन्त्री प्रकाशबहादुर शाहले जानकारी दिए । यसैगरी, मन्त्रिपरिषद बैठकले कैलालीको कैलारी गाउँपालिका-४ मा पर्ने नवलपुर गाउँलाई वडा नम्बर १ मा, डोटीको आदर्श गाउँपालिकाको वडा नम्बर ४ मा रहेको पातल गाउँलाई वडा नम्बर ५ मा समावेश गर्न पनि केन्द्र सरकारलाई सिफारिस गर्ने निर्णय गरेको छ । बैठकले डडेल्धुरास्थित भागेश्वर गाउँपालिकाको वडा नम्बर ४ को केन्द्रलाई गुवाडी टप्वामा सार्न सिफारिस गर्ने निर्णय गरेको छ ।

यसैगरी, मन्त्रिपरिषद बैठकले विपद व्यवस्थापन तथा राहत कोष विधेयक २०७५ को मस्यौदा तर्जुमा गर्नका लागि आन्तरिक तथा कानुन मन्त्रालयलाई सैद्धान्तिक स्वीकृति प्रदान गर्ने निर्णय गरेको छ । यस्तै, प्रदेशको कर तथा गैरकर राजस्व लगाउने र उठाउने सम्बन्धमा व्यवस्था गर्न बनेको विधेयक २०७५ लाई प्रदेश सभामा पेश गर्न स्वीकृति प्रदान गर्ने निर्णय गरेको छ ।

यसैगरी, मुख्यमन्त्री र मन्त्रीहरुको पारिश्रमिक तथा सुविधा सम्बन्धमा व्यवस्था गर्न बनेको विधेयक २०७५ लाई पनि प्रदेश सभामा पेस स्वीकृति प्रदान गर्ने निर्णय भएको प्रदेश सरकारका प्रवक्ता शाहले जानकारी दिए ।

यस्तै, सुशासन सम्बन्धमा व्यवस्था गर्न बनेको विधेयकको मस्यौदा तर्जुमाका लागि सैद्धान्तिक स्वीकृति प्रदान गर्ने निर्णय मन्त्रिपरिषद बैठकले गरेको छ । यसैबीच, मुख्यमन्त्री त्रिलोचन भट्टले बैठकमा सबै मन्त्रालय, सचिवालय, कार्यालयले आ-आफ्नो निकायको संगठन, संरचना र कर्मचारी दरबन्दी यकिन गरी मुख्यमन्त्री तथा मन्त्रिपरिषदको कार्यालयमा पेस गर्नुपर्ने ठाडो प्रस्ताव पेस गरेका छन् ।