सेयर बजारमा सूचीकृत कम्पनीहरुले धमाधम सुधारिएको वार्षिक प्रतिवेदन सार्वजनिक गरिरहँदा पनि बजारमा लगानीकर्ताको चासो फर्किन सकेको छैन । लामो समय ‘बियरिस ट्रेन्ड’ भोगेका लगानीकर्तालाई कम्पनीहरुको चौथो क्वाटरको सुधारिएको प्रतिवेदनले पनि आकर्षित गर्न नसकेको हो ।

बजार न्यून बिन्दुनजिक रहेका बेला लगानी बढाउनु तुलनात्मक रुपमा बढी सुरक्षित मानिन्छ । तर, अधिकांश लगानीकर्तामा बजार धेरै घट्दा भाग्ने र बढ्न थालेपछि प्रवेश गर्ने प्रवृत्ति भएकाले बजार सुस्ताएको सेयर बजार विश्लेषक बताउँछन् ।

तीन वर्षअघि ठूलो भोल्युममा पुँजी वृद्धिका भएका कारण कम्पनीहरुको सोही अनुपातमा नाफा वृद्धि गर्न सकेका छैनन् । बजारमा सेयर आपूर्ति चार गुणाभन्दा धेरैले बढेको छ । लगानीकर्ता नथपिँदा सेयर आपूर्तिअनुसार माग बढ्ने स्थिति छैन । सेयर बजारको प्रतिफलभन्दा बढी प्रतिफल बैंक ब्याजमार्फत दिएका छन् । ठूला लगानीकर्ता ‘पर्ख र हेर’को अवस्था छन् । त्यसको सीधा असर बजारमा परेको छ ।

महिनौंदेखिको सेयर कारोबारको भोल्युमले पनि बजार सुस्ताएको स्पष्ट संकेत गरेको छ । विगतमा दुई अर्ब रुपैयाँभन्दा बढीको सेयर एकैदिन किनबेच भएका उदाहरण थुप्रै छन् । तर, अहिले साताभरिको कारोबार बल्ल एक अर्बभन्दा माथि हुने गरेको छ । आइतबार (हिजो) को कारोबार त जम्मा १७ करोडमा सीमित रह्यो भने भने नेप्से १.४३ अंकले घट्यो ।

साताको दोस्रो कारोबार हुने दिन सोमबार पनि १९ करोड १७ लाखमा कारोबार सीमित भयो । बैंक, व्यापार, जलविद्युत र वित्त समूहको परिसूचक उकालो लागे पनि अन्य समूह बढ्न नसकेपछि समग्र बजार परिसूचक नकारात्मक बन्यो । सोमबार नेप्से ०.२१ अंकले घटेर ११८९.६७ अंकमा झरेको छ ।

घटेको बजारमा पनि सपोर्ट माइक्रोफाइनान्स, प्रोग्रेसिभ फाइनान्स, रिडी हाइड्रपावर, छिमेक लघुवित्तलगायत कम्पनीका लगानीकर्ताले कमाएका छन् भने मल्टिपर्पोज फाइनान्स, सिटी एक्सप्रेस फाइनान्स, नयाँ नेपाल लघुवित्तलगायत कम्पनीका लगानीकर्ताले गुमाएका छन् ।

प्रकाशित समय : २२:३७ बजे