वाणिज्य बैंकहरुले तत्काल कर्जाको व्याजदर घटाउन नसकिने बताएका छन् । वाणिज्य बैंकहरुको छाता संगठन नेपाल बैंकर्स संघका अध्यक्ष ज्ञानेन्द्रप्रसाद ढुंगानाले तत्काल कर्जाको व्याजदर घटाउन नसकिने बताएका हुन् । बैंक तथा वित्तीय संस्थाको नियामक निकाय नेपाल राष्ट्र बैंकले निर्देशन जारी गर्दै ऋणको ब्याज दर घटाउन दबाब दिएको छ । राष्ट्र बैंकले निक्षेपमा दिने र ऋणमा लिने कर्जाको ब्याज दर अन्तर पाँच प्रतशितबाट साढे चार प्रतिशतमा झार्न निर्देशन दिएको थियो । तर, वाणिज्य बैंकहरुले त्यसो गर्न नमानेका हुन् ।

अध्यक्ष ढुंगानाले कर्जाको तत्काल ब्याजदर २ प्रतिशत घटाउन बैंकसँग पर्याप्त लगानी नभएको तर्क गरे । उनले असोजबाट भने कर्जाको व्याजदर घटाउन सकिने बताए । विहीबार काठमाडौंमा आयोजित एक कार्यक्रममा अध्यक्ष ढुंगानाले बैंकहरुले लगानीलाई आकर्षण गर्न पनि तत्काल कर्जाको ब्याजदर घटाउन नमिल्ने स्पष्ट पारे ।

अध्यक्ष ढुंगानाले बैंकको आन्तरिक खर्च ८० प्रतिशतसम्म वृद्धि भएको बताए । ‘त्यसैले पनि कर्जाको व्याजदर तत्काल घटाउन सकिने अवस्था छैन ।’ देशका विभिन्न भागमा शाखा कार्यालयहरु स्थापना गर्दा बैंकको आन्तरिक खर्च बढ्न गएको उनको भनाइ छ ।

ब्याजदर निर्धारण गर्न राष्ट्र बैंकहरूले बैंकहरूलाई छाडिदिएको छ । अझै बैंकहरूले ११ प्रतिशतको सीमा नतोकिदिएको भए १५, १६ प्रतिशतसम्म पुग्थ्यो । ब्याजदर धेरै हुनु अर्थतन्त्रका लागि राम्रो मानिँदैन । ब्याजदर घटाउने सवालमा अझै बजार तयार नभएको ढुंगानाको भनाइ छ ।

पछिल्लो समय बैंकमा निक्षेप वृद्धि हुन थालेको छ । ब्याजदर घट्न खोजिरहेको छ । बैंकहरुका बेस रेट (आधार मूल्य) कम छ । बेस रेट घटेपछि ऋणको ब्याजदर घट्ने हो । ‘बैंकहरूमा अझै कम्फर्टटेबल स्थिति भइसकेको छैन,’ उनले भने, ‘यसका लागि समय लाग्छ ।’