अर्थमन्त्री डा. युवराज खतिवडाले कानुन नबनाई कर असुली नगर्न सबै स्थानीय तहहरुलाई निर्देशन दिएका छन् । आइतबार काठमाडौंमा आयोजित कार्यक्रममा बोल्दै अर्थमन्त्री खतिवडाले सबै निकायलाई दोहोरो कर नलिन तथा क्षेत्राधिकार बाहिर गएर कर असुल नगर्नसमेत निर्देशन दिए ।

पछिल्लो समय बढी कर लगाएको भन्दै सरकारको व्यापक आलोचना भएको छ । तर खतिवडाले भने संघीयता कार्यान्वन, लोककल्याणकारी राज्यको अवधारणा तथा सामाजिक न्याय अनुरुप कर लिने गरिएको दावी गरेका छन् ।

करको बोझले जनता आजित भएको भन्दै व्यापक आलोचना भइरहँदा खतिवडाले कर तिर्न नसक्नेलाई कर नलगाउँने प्रष्टिकरण दिए । संघीयताको मर्म अनुरुप प्रदेश र स्थानीय तहमा करको प्रावधान राखिएको स्पष्ट पारे ।

करको दुरुपयोग हुन नदिन सरकार सचेत रहेको बताएका अर्थमन्त्री खतिवडाले विकास निर्माण तथा सेवाका लागि सरकारले कर लिने गरेको उल्लेख गरे ।

प्रकाशित समय : १९:३४ बजे