एक पछि अर्काे गर्दै बलात्कारका घटना सार्वजनिक भइरहँदा रुपन्देहीमा एक युवतीको बलात्कार पछि हत्या भएको छ । स्थानीयले दिएको जानकारी अनुसार रुपन्देहीको गैडहवा गाँउपालिका र शुद्धोधन गाँउपालिकाको सीमानामा पर्ने दानव नदीमा एक युवतीको शव फेला परेको हो ।

नाम र ठेगाना नखुलेको अन्दाजी २०/२२ वर्षकी युवतीलाई बहोरवा सामुदायिक बनको सालघारीभित्र बलत्कार गरि हत्या पश्चात नाङ्गो पारि दानवनदीमा शव फयाकिएको अवस्थामा स्थानीयले देखेर प्रहरीलाई खबर गरेको गैडहवा गाँउपालिका– ६ का वडा अध्यक्ष रामबेलाश यादवले जानकारी दिए ।

उनले घटना दानवतापूर्ण तथा अमानवीय ढंगबाट गरिएको हुँदा जसरी पनि दोषी पत्ता लगाई कडा भन्दा कडा सजाय दिलाउनु पर्ने मागसमेत गरे ।

सो सम्बन्धमा जिल्ला प्रहरी कार्यालय रुपन्देहीका प्रहरी प्रमुख हृदय थापासँग जिज्ञासा राख्दा उनले युवतीको चुन्नी, शूट (कपडा) बहोरवा सामुदायिक जंगलभित्र र लाश दानवनदीको पानीभित्र नग्न अवस्थामा तैरिरहेको स्थनीयले देखेपछि प्रहरीलाई जानकारी दिएको बताए । ती युवतीको शव भीम अस्पताल भैरहवामा पोष्टमार्टम पश्चात अनुसन्धान कार्य प्रहरीद्वारा अगाडी बढाइएको उनको भनाई छ ।

उक्त घटनाले सूर्यपूरा बजार आसपासको क्षेत्रमा सनसनी मच्चिएको छ । महिलाहरु एक्लै घर बाहिर निस्किन असुरक्षित महशूस गर्न थालेको खबर छ । यो खबर तयार पार्दा सम्म ती युवतीको शवको पहिचान हुन सकेको छैन । जसका कारण सनाखत हुन नसकेको प्रहरीले जनाएको छ ।

प्रकाशित समय : ०१:३० बजे