यसपालीको दशैँका लागि यही भदौ २४ गतेबाट अग्रिम टिकट बुकिङ सुरु हुने भएको छ । यातायात व्यवस्था विभागसँगको छलफलपछि यातायात व्यवसायीहरु भदौ २४ गतेदेखि टिकट बुकिङ खुलाउन सहमत भएका हुन् ।

कतिपय स्थानमा नयाँ काउन्टर राख्ने र बाँकी पुरानै काउण्टरबाट टिकट बिक्री हुने जनाइएको छ । गएको वर्षको दशैमा चलेका गाडी र यात्रुको तथ्याङक हेरेर सोही अनुसार गाडीको व्यवस्थापन गर्ने यातायात व्यावस्था विभागले जनाएको छ ।

विभागका प्रवक्ता गोकर्णप्रसाद उपाध्ययले भने, ‘केही गाडी थप्ने र काठमाडौं उपत्यकामा सञ्चालनमा रहेका केही सवारी साधनलाईसमेत उपत्यका नजिकको रुटमा सञ्चालन गराउने तयारी छ ।’

हरेक वर्ष दशैंका लागि सय वटा नयाँ बस व्यवसायीमार्फत् नयाँ गाडी भित्रँदै आएको थियो । यस वर्ष भने धेरै नयाँ बस थपिने संभावना नभएको बताइन्छ । यातायात क्षेत्रमा रहेको सिण्डिकेटको अन्त्य गर्दै यातायात व्यवसायीहरुले कम्पनी दर्ता गराउनु पर्ने प्रावधानको व्यवस्था गरिएको छ । धेरै व्यवसायीहरु कम्पनीमा नगएकाले नयाँ गाडी धेरै ल्याउने संभावना नरहेको बताइन्छ ।

भाडा बढाएर यात्रुको ढाड सेकिँदै
दशैँ नजिकिँदै गएपछि बस भाडा वृद्धिका लागि व्यापारीको दबाब बढेपछि केही भाडा बढाउने विषयमासमेत छलफल भएको छ । २०७० सालदेखि भाडा नबढेको भन्दै व्यवसायीहरुले बढाउनु पर्ने माग गर्दै आएका छन् । यसअघि २०७२ सालमा भाडा बढाए पनि सर्वसाधारणको दबाबका कारण बढाइएको भाडा फिर्ता गराइएको थियो ।

प्रवक्ता उपाध्ययले भने, ‘विभागले यातायतको लागत हेरेर वैज्ञानिक रुपले भाडा व्यवस्थापन गर्छ, आउँदो सोमबार यातायात व्यवयासी र विभागबीच छलफल हुनेछ ।’

यात्रु सहायता कक्ष राखिने
दशैँमा टिकट काट्न यातायत व्यवस्था विभागले ट्राफिक प्रहरीसँग समन्वय गरी विभिन्न बसपार्कमा यात्रु सहायता कक्ष राख्ने भएको छ । यात्रुहरुले सहज रुपमा टिकट पाउन् र यात्रु नठगिउन् भनेर सहायताकक्ष राखिने जनाइएको छ ।

‘मनोमानी भाडा नउठाउन् र यात्रुहरु नठगिउन् भनेर हरेक वर्षजस्तै हेल्पडेक्स राखिने छ,’ उपाध्यायले भने । विभागमा हालसम्म ३२ लाख २१ हजार ४३ वटा सवारीसाधन दर्ता भएका छन् । तिनमा ४८ हजार ४ सय ५८ ठूला बस, २४ हजार ८ सय ७२ मिनी बस, ६ हजार ६ सय ५७ माइक्रोबस छन् । तिनै सवारी साधनले दशैँमा यात्रुलाई सेवा पुर्याउने छन् ।

टिकट काट्न लाईनने बस्नुपर्ने
यसवर्ष अग्रिम टिकट बुकिङको लागि इ–टिकेटिङ् लागु नहुने भएको छ । विभागले दुई तीन वर्ष अघिदेखि नै इ–टिकेटिङको अवधारण ल्याएको थियो । इ–टिकट व्यवस्थामा भए घरमै बसेर टिकट लिन सकिने थियो । तर इ–टिकट बुकिङको लागि प्राविधिक तयारी नभएको विभागको भनाई छ ।

‘यसपटक तयारी नपुगेकोले यात्रुहरुले लाइनमै बसेर टिकट लिनु पर्नेछ,’ विभागका अधिकारीहरुले भने । अर्को वर्षदेखि जसरी पनि इ–टिकेटिङको व्यवस्था गरिने विभागको दावी छ ।

प्रकाशित समय : २३:३८ बजे